مۇحيتتا جاسالعان قىلمىس: قىتايدا كاپيتان كىسى قولىنان قازا تاپتى

استانا. KAZINFORM - شاندۋڭ پروۆينتسياسىنداعى ۆەيحاي تەڭىز پوليتسياسى «ءۇندى مۇحيتىنىڭ اشىق ايدىنىنا ساپار شەككەن بالىقشى كەمەسىنىڭ كاپيتانى ەكيپاج مۇشەسىنىڭ قولىنان قازا تاپتى» دەگەن اقپاراتتى راستادى.

ۆەيحاي تەڭىز پوليتسياسىنىڭ مالىمدەمەسىندە كۇدىكتىنىڭ كەمەدە قاماۋعا الىنعانى ايتىلدى.

ناقتىراق ايتقاندا، 11-ناۋرىز كۇنى جۋنچەن قالاسىنا تيەسىلى بالىقشىلار كەمەسىندە قاندى قىلمىس بولىپ، ءبىر ادام قازا تاپقان. ءتارتىپ ساقشىلارى 12-ناۋرىز كۇنى وسى وقيعا بويىنشا ءىس قوزعاعان، كۇدىكتى قامالىپ، كەمە ساپاردان قايتىپ كەلەدى. قىلمىستىق ءىس زاڭ اياسىندا تەرگەلىپ جاتىر.

قىلمىستىق وقيعا تۋرالى ەڭ العاش كاپيتاننىڭ قىزى 20-ناۋرىز كۇنى الەۋمەتتىك جەلىدە جازبا جاريالاپ، دابىل قاققان بولاتىن. ونىڭ ايتۋىنشا، اكەسى بىلتىر ماۋسىم ايىندا بالىقشى كەمەسىمەن الىس ساپارعا اتتانعان. جوسپار بويىنشا بيىل ماۋسىم ايىندا ورالۋعا ءتيىس ەدى. الايدا 12-ناۋرىز كۇنى اكەسىنىڭ كىسى قولىنان جازىم بولعانى تۋرالى سۋىق حابار جەتكەن.

- 11-ناۋرىز كۇنى تاڭعى 7:30 شاماسىندا ءۇندى مۇحيتىنىڭ اشىق ايدىنىندا قاندىقول اكەمدى ءولتىرىپ، دەنەسىن تەڭىزگە لاقتىرىپ جىبەرگەن. قانىشەردى ەكيپاج مۇشەلەرى ۇستاپ وتىر، ال كەمە ەلگە قايتۋ تۋرالى بۇيرىق العان. بۇل ساپار شامامەن 25 كۇنگە سوزىلادى، سوندىقتان كەمە ءساۋىر ايىندا ەلگە جەتۋى ءتيىس، - دەپ جازدى ول.

ول The Paper اقپاراتتىق پورتالىنا بەرگەن سۇحباتىندا قىلمىسقا قاتىستى كەمەنىڭ «لۋ جۋن يۋان يۋي» پرەفيكسىمەن تىركەلگەنىن ايتقان. بۇل دەرەك وسىدان ون نەشە جىل بۇرىن قىتايدى ءدۇر سىلكىندىرگەن تاعى ءبىر اتىشۋلى قىلمىستى ينتەرنەت قولدانۋشىلارىنىڭ ەسىنە قايتا ءتۇسىرىپ، قىزۋ پىكىرتالاس تۋدىردى.

2011 -جىلى «لۋ جۋن يۋي 2682» اتتى كەمە تىنىق مۇحيتىنىڭ اشىق ايدىنىنا شىققان ساپارىندا ەكيپاج مۇشەلەرى اراسىندا قاقتىعىس تۋادى. سالدارىنان 16 ادام قازا تاۋىپ، 6 ادام ءىز-ءتۇسسىز جوعالىپ كەتەدى. جاعاعا ءتىرى جەتكەن 11 ادامنىڭ بارلىعى سوتتالىپ، 5 ەۋى ءولىم جازاسىنا كەسىلگەن بولاتىن.

اۆتور

ەرلان مازان