مۇحتار شاحانوۆ قازاق قىزىنا ۇيلەنگەن برازيليالىق جىگىتكە باتا بەردى
استانا. قازاقپارات – بەلگىلى اقىن مۇحتار شاحانوۆ قازاق قىزىنا ۇيلەنگەن برازيليالىق سپورتشى دۋگلاس پۋماعا باتاسىن بەردى. ارالاس جەكپە-جەك جۇلدىزى ەرەكشە ءساتتى الەۋمەتتىك جەلىدە جاريالادى.
«Naiza» پروموۋشەنىندە جۇدىرىقتاساتىن دۋگلاس پۋما ايگىلى مۇحتار شاحانوۆتان باتاسىن العان ۆيدەوسىن Instagram-داعى پاراقشاسىندا جاريا ەتتى. سوزىنشە، اقىن ونىڭ ۇيىنە قوناق بولىپ كەلگەن.
بۇگىن جۇبايىمنىڭ ۇيىندە وتكەن مەرەكەلىك كەشتە مەن قازاقستاننان شىققان اڭىز اقىن، لەگەندا ادام مۇحتار شاحانوۆتى كوردىم. ول كىسىمەن سۇحباتتاسۋ مەن ءۇشىن ۇلكەن ماقتانىش جانە قۋانىش. ماعان جانە مەنىڭ ايەلىمە ايتقان ءاربىر تىلەگىڭىزگە، نيەتىڭىزگە العىس بىلدىرەمىن. بۇل كەزدەسۋ مەن ءۇشىن ماقتانىش! ومىرىمدەگى بارلىق جاقسى كۇندەرىم ءۇشىن اللاعا سانسىز شۇكىرشىلىكتەر ايتامىن. اڭىز اداممەن ءبىر ەستەلىك ۆيدەو بولسىن. مۇحتار اعانىڭ تىلەگى مەن ءازىلىن ۆيدەودان كورە الاسىزدار، - دەپ جازدى سپورتشى. دۋگلاس پۋما شاحانوۆقا اق باتاسى مەن تىلەگى ءۇشىن العىسىن ايتتى.
