مۇحتار اۋەزوۆتىڭ «قاراگوز» تراگەدياسىنىڭ سەناريىمەن فيلم ءتۇسىرىلۋى مۇمكىن

استانا. KAZINFORM - مۇحتار اۋەزوۆتىڭ پەساسى نەگىزىندە جازىلعان «قاراگوز» كينوجوباسى ۇلتتىق كينونى قولداۋ مەملەكەتتىك ورتالىعى وتكىزىپ جاتقان كونكۋرستىڭ ەكىنشى كەزەڭىنە وتكەن. بۇل جايىندا مادەنيەت جانە اقپارات مينيسترلىگى Kazinform ساۋالىنا جولداعان جاۋابىندا ءمالىم ەتتى.

- ۇلتتىق كينونى قولداۋ مەملەكەتتىك ورتالىعى جاريالاعان كونكۋرستىڭ ەكىنشى كەزەڭىنە ىرىكتەلگەن جوبالاردىڭ قاتارىندا جازۋشى مۇحتار اۋەزوۆتىڭ پەساسى نەگىزىندە جازىلعان «قاراگوز» كينوجوباسى بار. الايدا، بۇل - جوبا وندىرىسكە جىبەرىلەدى دەگەن ءسوز ەمەس. سەبەبى اتالعان جوبا قولدانىستاعى زاڭناماعا سايكەس ىرىكتەلەدى. جوبا ەكىنشى كەزەڭنەن ءساتتى وتكەن جاعدايدا، تىكەلەي ەفير ارقىلى وتەتىن پيتچينگكە، ياعني اشىق قورعاۋعا جىبەرىلەدى. ورتالىق پيتچينگتەگى ساراپتاما كەڭەسىنىڭ قورىتىندىسىن ۆەدومستۆوارالىق كوميسسيانىڭ قاراۋىنا ەنگىزەدى. كونكۋرستىق ىرىكتەۋدىڭ ناتيجەسى بويىنشا مينيسترلىك كينوجوبالاردى قارجىلاندىرۋ تۋرالى تۇپكىلىكتى شەشىمدى قابىلدايدى، - دەپ جازىلعان جاۋاپتا.

ايتا كەتۋ كەرەك، مۇحتار اۋزەوۆتىڭ «قاراگوز» تراگەدياسى - قان جاقىندىعى جەتى اتادان اسپايتىن سىرىم مەن قاراگوزدىڭ اراسىنداعى سەزىم ازابى تۋرالى تۋىندى.

ەسكە سالساق، مادەنيەت جانە اقپارات مينيسترلىگى بەلگىلى جازۋشى مۇحتار ماعاۋيننىڭ «تازىنىڭ ءولىمى» اتتى اڭگىمەسىنىڭ جەلىسىمەن كوركەم فيلم ءتۇسىرۋ ءۇشىن سەناري ىرىكتەۋ جۇمىستارىن باستادى.