مۇحاممەد پايعامباردىڭ جازعان حاتىنىڭ كوشىرمەسى كورمەگە قويىلدى
استانا. KAZINFORM - ورتالىق ازياداعى يسلام كالليگرافيالىق شەبەرلەرى استانادا باس قوستى.
استانادا العاش رەت «قۇسنيحات: ورتالىق ازياداعى يسلام كالليگرافياسى» اتتى كورمە اشىلدى.
ەل استاناسىندا ۇيىمداستىرىلعان كورمەگە گرافيكالىق جازۋ ونەرى شەبەرلەرىنىڭ 30 عا جۋىق تۋىندىسى قويىلعان.
ەلورداعا جەتكىزىلگەن قۇندى جادىگەرلەر قاتارىندا يمام ال-ءبۋحاريدىڭ سيا ساۋىتى، «ومار يبن حاتتابتىڭ قانى تامعان» قۇران كىتابىنىڭ كوشىرمەسى جانە مۇحاممەد (س. ع. س.) پايعامباردىڭ ۆيزانتيا يمپەراتورى مەن باحرەين كورولىنە جازعان حاتتارىنىڭ كوشىرمەلەرى بار. ونى وزبەكستاندىق كالليگراف حابيبوللا ساليح جازىپ شىققان. ايتۋىنشا، بۇل قۇران كىتابىنىڭ 7- كوشىرمەسى. ەڭ العاشقى جازباعا 3 جىلدان استام ۋاقىتىن ارناپتى.
- قالعان التاۋى ەكى جىلعا جەتەر-جەتپەس ۋاقىتتا جازىلدى، - دەيدى ول.
كالليگراف حابيلوللا ساليح اتاپ وتكەندەي، بۇل تۋىندىلاردى وزبەكستانداعى اعايىن كورىپ، تاماشالاپ ءجۇر.
- وسى استاناداعى كورمەگە ارنايى قازاق باۋىرلارىمىز كورسىن دەپ الىپ كەلدىم. ەندى قاراپ وتىرساڭىز، پايعامبارىمىزدىڭ جازعان حاتىن اينىتپاي كوشىردىم. پاپيرۋستىڭ كولەمدەرى دە بىردەي. بۇل كوشىرمەنىڭ ءبىر عانا داناسى. باسقا جوق. بۇدان بولەك، «وماردىڭ قانى تامعان قۇران» دەپ اتالادى. ونى جەتى رەت كوشىرىپ جازدىم. ەڭ العاشقىسى ۇزاقتاۋ بولعانىمەن، كەيىنگىلەرىندە قولىم ۇيرەنىپ كەتتى. نەگىزى مۇنداي كورمەلەردى ءجيى ۇيىمداستىرىپ تۇرۋ كەرەك دەپ ويلايمىن. سەبەبى، كالليگرافيا ونەرى ۇمىت بولىپ بارا جاتىر، - دەدى حابيلوللا ساليح.
بۇدان بولەك، كورمەگە ورتا ازياداعى جازۋ ونەرىمەن اينالىسىپ جۇرگەن باسقا دا شەبەرلەردىڭ تۋىندىلارى دا قويىلعان. نەگىزگى ماقسات - ۇمىت بولعان ونەردى ناسيحاتتاۋ، كالليگرافيا جازۋىن دارىپتەۋ.
كالليگراف ورىنباسار اسىلبەكتىڭ سوزىنشە، «قۇسنيحات: ورتالىق ازياداعى يسلام كالليگرافياسى» اتتى كورمەگە 5 مەملەكەت شەبەرلەرى قاتىسىپ جاتىر.
- بۇل كورمەگە 5 مەملەكەت تۇرىكمەن، تاجىك، وزبەك، قازاق، قىرعىز ەلدەرىنەن كەلگەن شەبەرلەر قاتىسىپ وتىر. ورتالىق ازيا ەلدەرىنىڭ كورمەسى العاش رەت قولعا الىندى. ءارى بۇل قازاقستاندا باستاۋ الدى. الداعى ۋاقىتتا باسقا كورشى مەملەكەتتەرگە جەتكىزىلەتىن بولادى. بۇل جەردەگى ەڭ باستى نارسە تەك قانا ءدىندى ەمەس، ءدىننىڭ ونەرىن ناسيحاتتاۋ. ساۋلەت ونەرى بولادى، كالليگرافيا ونەرى بولادى، باسقا دا تۇستارىن تانىتا ءبىلۋ جانە دە ناسيحاتتاۋ، - دەدى ورىنباسار اسىلبەك.
ايتپاقشى، كورمە ەل تاۋەلسىزدىك العالى العاش رەت ۇيىمداستىرىلىپ وتىر. كورمە ءۇش كۇنگە جالعاسادى. كىرۋ تەگىن.
بۇعان دەيىن بەلگيا استاناسىندا قازاقستاندىق زەرگەردىڭ كورمەسى ءوتىپ جاتقانىن جازعان ەدىك.
اۆتور
زۇلقارناي ەرمۇرات ۇلى
