مەديتسينالىق ۇيىمدار تاۋەكەل ايماقتارىنا بولىنبەك
استانا. KAZINFORM - الەۋمەتتىك مەديتسينالىق ساقتاندىرۋ قورى مەديتسينالىق قىزمەتتەر ساپاسىنا مونيتورينگ جۇرگىزۋ ادىستەرىن جەتىلدىرۋ اياسىندا تاۋەكەلدەردى باسقارۋ جۇيەسىن ەنگىزەدى.
بۇل جايىندا ءماجىلىس جانىنداعى قوعامدىق پالاتانىڭ كوشپەلى وتىرىسىندا اتالعان قور ءتوراعاسىنىڭ ورىنباسارى ينديرا ساركەنوۆا ايتتى.
ونىڭ اتاپ وتۋىنشە، تاۋەكەلدەردى باسقارۋ جۇيەسىن ەنگىزۋ مەديتسينا ۇيىمدارىن تومەن، ورتاشا نەمەسە جوعارى تاۋەكەل ايماقتارىنا بولۋگە مۇمكىندىك بەرەدى. بۇل رەتتە قىزىل، سارى جانە جاسىل ايماققا ءبولۋ ارقىلى رەيتينگ ازىرلەنەدى.
- ەگەر كلينيكادا مەديتسينالىق كومەك كورسەتۋ بارىسىندا زاڭ بۇزۋشىلىق پەن اۋىتقۋ بولماسا، وندا ول اۆتوماتتى تۇردە جاسىل ايماققا تۇسەدى. بۇل وندىرىستىك بازاعا بارىپ مونيتورينگ جۇرگىزۋ نەمەسە ونىڭ قىزمەتىن ءجىتى زەردەلەۋ قاجەتتىگىن جوق ەكەنىن بىلدىرەدى. بۇل جەتكىزۋشىلەردى قاجەتتى نورمالار مەن ەرەجەلەردى ساقتاۋعا ىنتالاندىرادى، - دەدى ينديرا ساركەنوۆا.
قور ءتوراعاسى ورىنباسارىنىڭ ايتۋىنشا، سارى جانە قىزىل ايماققا تاپ بولعان مەديتسينالىق ۇيىمداردىڭ مەديتسينالىق كومەك كورسەتۋ ساپاسى جان-جاقتى زەردەلەنىپ، كەلىسىمشارت مىندەتتەمەلەرىنە مونيتورينگ جۇرگىزىلەدى.
- قورىتىندىسىندا مەديتسينالىق كومەك كورسەتۋ پروتسەستەرىن جەتىلدىرۋ بويىنشا ۇسىنىمدار مەن شەشىمدەر ازىرلەنەدى، - دەدى ول.
ونىڭ پايىمىنشا، جەتكىزۋشىلەردىڭ جارتىسىنان كوبى جاسىل نە سارى ايماققا، ال شامامەن 41 پايىزى قىزىل ايماققا تاپ بولادى.
ايتا كەتەيىك، وسىعان دەيىن قر دەنساۋلىق ساقتاۋ مينيسترلىگى قوماقتى سومادا قارىزى بار مەديتسينالىق ۇيىمدارعا قاتىستى تۇسىنىك بەردى.
