مەديتسينالىق مەكەمەلەردە ءدارى-دارمەك تاپشىلىعى مۇلدەم بولماۋى كەرەك - پرەمەر-مينيستر
استانا. قازاقپارات - 2025 -جىلعا ارنالعان ءدارى-دارمەكتى جەتكىزۋ راسىمدەرى بيىلدىڭ سوڭىنا دەيىن اياقتاۋ كەرەك. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ءمالىم ەتتى.
«پرەزيدەنت ۇلت دەنساۋلىعىن نىعايتۋ ءۇشىن كەشەندى شارالاردى ىسكە اسىرۋدى تاپسىردى. بۇل ورايدا حالىقتى ءدارى-دارمەكپەن قامتاماسىز ەتۋ اسا ماڭىزدى ماسەلە سانالادى. مەملەكەت مەديتسينالىق كومەك كورسەتۋ كەزىندە جانە ەسەپتە تۇرعاندارعا دارىلىك زاتتاردى تەگىن بەرەدى. بۇل ماقساتقا بيىلدىڭ وزىندە بيۋدجەتتەن شامامەن 500 ميلليارد تەڭگە ءبولىندى. ءدارى-دارمەكپەن ۇزدىكسىز قامتاماسىز ەتۋ جانە ولاردى الدىن الا ساتىپ الۋ - ەڭ باستى مىندەتتەردىڭ ءبىرى. اۋرۋحانالار مەن ەمحانالار ءۇشىن 2025 -جىلعا ارنالعان ءدارى-دارمەكتەردى ساتىپ الۋ مەن جەتكىزۋ راسىمدەرىنىڭ بارلىعىن وسى جىلدىڭ سوڭىنا دەيىن اياقتاۋ قاجەت»، - دەدى و. بەكتەنوۆ.
بۇل تۇرعىدا ۇكىمەت باسشىسى مەديتسينالىق مەكەمەلەردە ءدارى-دارمەك تاپشىلىعى دەگەن مۇلدەم بولماۋى كەرەك ەكەنىن قاداپ ايتتى.
«بۇعان دەنساۋلىق ساقتاۋ ءمينيسترى مەن س ق-فارماتسيا باسشىسى تىكەلەي جاۋاپ بەرەدى. جالپى، ءدارى-دارمەك نارىعىن جەكەمەنشىك وندىرۋشىلەر، جەتكىزۋشىلەر جانە ءدارىحانا جەلىلەرى قالىپتاستىرادى. بۇل بيزنەستى مەملەكەت پرەپاراتتاردىڭ قاۋىپسىزدىگى، ساپاسى جانە ولاردى تىركەۋ تۇرعىسىنان عانا رەتتەيدى. جۋىردا دارىلىك زاتتاردى تاڭبالاۋ مەن قاداعالاۋدى ەنگىزۋ اياقتالدى. ول ءدارى-دارمەكتىڭ وندىرۋشىدەن ەمدەلۋشىگە دەيىنگى قوزعالىسىن شتريح-كود ارقىلى قاداعالاپ وتىرۋعا مۇمكىندىك بەردى. بۇرىن جەتكىزۋ تىزبەگىن باقىلاي المايتىنبىز. ءدارىحانالارعا كونترافاكتىلىك جانە ساپاسىز پرەپاراتتاردىڭ ءتۇسۋ قاۋپى دە بار ەدى. ەندى ءبىز اۋرۋحانالار مەن ەمحانالارداعى دارىلىك زاتتاردىڭ قوزعالىسىن ەمىن-ەركىن كورىپ وتىراتىن بولامىز. بۇل تەگىن پرەپاراتتاردىڭ زاڭسىز اينالىمىنا جول بەرمەيدى. ياعني، وسى ماسەلەدە ءتارتىپ ورناتىلدى»، - دەدى پرەمەر-مينيستر.
بۇدان بۇرىن حابارلانعانداي، 2024 -جىلدىڭ 1-شىلدەسىنەن باستاپ ەلىمىزدە دارىلىك زاتتاردى تاڭبالاۋ مەن قاداعالاۋ ەنگىزىلدى.
اۆتور
رۋسلان عابباسوۆ
