مەديانىڭ جىبەك جولى: استانا وڭىرلەردى بىرىكتىرەدى
استانا. KAZINFORM - استانادا قىتايدىڭ جەتەكشى «رىنمين رىباۋ» باسىلىمىنىڭ باستاماسىمەن «ورتالىق ازيا - قىتاي» حالىقارالىق مەديافورۋمى ءوتىپ جاتىر. ءىس-شارانىڭ تەڭ ۇيىمداستىرۋشىسى - قازاقستان رەسپۋبليكاسى پرەزيدەنتىنىڭ تەلەراديوكەشەنى.
فورۋمنىڭ باستى تاقىرىبى - «ب ا ق ارقىلى جىبەك جولى: قىتاي مەن ورتالىق ازيانىڭ ورتاق تاعدىر قاۋىمداستىعىن قۇرۋ». بۇل تالقىلاۋعا قازاقستان، قىتاي، وزبەكستان، قىرعىزستان، تاجىكستان، تۇرىكمەنستان ەلدەرىنىڭ ب ا ق باسشىلارى، ساياساتكەرلەر، جۋرناليستەر، ساراپتامالىق ورتالىقتار مەن عىلىمي-زەرتتەۋ ينستيتۋتتارىنىڭ وكىلدەرى قاتىستى.
فورۋم بارىسىندا قىتاي كوممۋنيستىك پارتياسى ورتالىق كوميتەتىنىڭ 20- شاقىرىلىمىنىڭ مۇشەسى، ورتالىق ۇگىت-ناسيحات ءبولىمىنىڭ ءتوراعا ورىنباسارى، كۇندەلىكتى جۇمىسقا جاۋاپتى حۋ حەپين مەملەكەت باسشىسىنا فورۋمدى قولداعانى ءۇشىن ريزاشىلىعىن ءبىلدىردى:
- پرەزيدەنت توقايەۆ وسى فورۋمعا ارنايى قۇتتىقتاۋ حاتىن جولدادى. بۇل قازاقستاننىڭ بۇل شاراعا قانشالىقتى ءمان بەرەتىنىن كورسەتەدى. بۇل قادام ەكى ەل اراسىنداعى اقپارات الماسۋدى تەرەڭدەتىپ، قىتاي مەن ورتالىق ازيا مەملەكەتتەرى مەدياسىنىڭ ءوزارا ىنتىماقتاستىعىن نىعايتۋعا زور ىقپال ەتەدى. ءبىز پرەزيدەنت توقايەۆقا شىنايى العىسىمىزدى بىلدىرەمىز، - دەدى.
حۋ حەپيننىڭ ايتۋىنشا، قىتاي مەن ورتالىق ازيانىڭ ورتاق تاعدىر قاۋىمداستىعىن قۇرۋ - قازىرگى ۋاقىتتىڭ جاڭا جاعدايلارىنا سايكەس قابىلدانعان تاريحي تاڭداۋ جانە بۇل شەشىم حالىقتاردىڭ تۇبەگەيلى مۇددەلەرى مەن جارقىن بولاشاعىنا نەگىزدەلگەن.
- قىتاي ورتالىق ازيا ەلدەرىمەن جوعارى دەڭگەيدەگى ۋاعدالاستىقتاردى جۇزەگە اسىرا وتىرىپ، ساياسي سەنىمگە، دوستىق پەن تاتۋ كورشىلىككە نەگىزدەلگەن قارىم- قاتىناستى نىعايتۋدى كوزدەيدى. ءبىز بىرلەسىپ «جاڭا التىن وتىز جىلدىقتى» قالىپتاستىرۋدى قالايمىز. ويتكەنى مەملەكەتتەر اراسىنداعى دوستىق حالىقتار اراسىنداعى جاقىندىقتان، ال حالىقتاردىڭ جاقىندىعى جۇرەكتەن شىققان ۇيلەسىمنەن باستالادى، - دەپ اتاپ ءوتتى ول.
ق ر پرەزيدەنتى تەلەراديوكەشەنىنىڭ ديرەكتورى راۋشان قاجىبايەۆا ءوز سوزىندە ۇلى جىبەك جولى الەمدىك قۇرىلىمنىڭ اۋقىمدى وزگەرىستەرىنە كۋا عانا ەمەس، سونىمەن قاتار ونىڭ قوزعاۋشى كۇشىنە اينالعانىن اتاپ ءوتتى.
- «ءبىر بەلدەۋ، ءبىر جول» جوباسى - تەك ينفراقۇرىلىم مەن ەكونوميكا عانا ەمەس. بۇل - ادامزاتتىڭ ورتاق تاعدىرىنا نەگىزدەلگەن فيلوسوفيا. بۇل يدەيا بىزگە ەرەكشە جاقىن. ءبىز - ۇلى جىبەك جولىنىڭ مۇراگەرىمىز. بۇگىن تاۋار ەمەس، يدەيا، ماعىنا مەن سەنىم بايلانىسى جايلى ايتىپ وتىرعانىمىز سيمۆولدىق مانگە يە. سەبەبى ەلدەر اراسىنداعى شىنايى جاقىندىق - ادامدىق تۇسىنىك پەن قىزىعۋشىلىقتان باستالادى. بۇل ۇدەرىستە باق- تىڭ ءرولىن اسىرا باعالاۋ مۇمكىن ەمەس، - دەدى ر. قاجىبايەۆا.
سونداي-اق فورۋمدا «رىنمين رىباۋ» گازەتى باس رەداكتورىنىڭ ورىنباسارى فان جيانشان ءسوز سويلەپ، قىتاي مەن ورتالىق ازيانىڭ بەس ەلى ەكىجاقتى فورماتتا ورتاق تاعدىر قاۋىمداستىعىن قۇرۋ تۋرالى رەسمي مالىمدەگەنىن ايتتى.
- ادامزاتتىڭ ورتاق تاعدىر قاۋىمداستىعى يدەياسى بىرتىندەپ جاھاندىق كەلىسىم مەن ورتاق قۇندىلىققا اينالىپ، قۋاتتى قوزعالىسقا ۇلاسىپ كەلەدى. بۇل تۇجىرىمنىڭ العاش رەت تەك ەكىجاقتى ەمەس، تۇتاس وڭىرلىك فورماتتا قولدانىلۋى - تاراپتاردىڭ ىنتىماقتاستىقتى جاڭا دەڭگەيگە كوتەرۋگە دەگەن ۇمتىلىسىن كورسەتەدى، - دەدى ول.
فورۋم اياسىندا «ءبىر بەلدەۋ، ءبىر جول» اقپاراتتىق جەلىسىنىڭ تانىستىرىلىمى، «جىبەك جولىنىڭ اۋەنى» مۋزىكالىق بەينەبايانىنىڭ تۇساۋكەسەرى ءوتتى. سونداي-اق قىتاي مەن ورتالىق ازيا ەلدەرى ب ا ق وكىلدەرىنە ارنالعان بىرلەسكەن جوعارى ساپالى جوبالار بويىنشا باسپا ءسوز تۋرى باستالدى.
اۆتور
گۇلنۇر عازيز قىزى
