مەدساقتاندىرۋ قورىنا رەسپۋبليكالىق بيۋدجەتتەن 1,3 تريلليون تەڭگە بولىنگەن
استانا. KAZINFORM - قارجى ءمينيسترى ءمادي تاكيەۆ ۇكىمەت وتىرىسىندا رەسپۋبليكالىق بيۋدجەتتىڭ قالاي جۇمسالىپ جاتقانىن باياندادى.
«رەسپۋبليكالىق بيۋدجەتتىڭ شىعىس بولىگى 16,7 تريلليون تەڭگە بولدى. اتاپ ءوتۋ كەرەك، مۇندا الەۋمەتتىك باعىتتىڭ باسىمدىعى ساقتالىپ قالدى. مەملەكەت نەگىزگى الەۋمەتتىك مىندەتتەمەلەردى ورىندادى.
ماسەلەن، زەينەتاقى مەن جاردەماقىعا 4 تريلليون تەڭگە، وڭىرلەر سۇراتقان سۋبۆەنتسيالارعا 4 تريلليون تەڭگە، مىندەتتى مەديتسينالىق ساقتاندىرۋ قورىنا 1,3 تريلليون تەڭگە باعىتتالدى»، - دەدى ۆەدومستۆو باسشىسى.
ال اكىمدىكتەردىڭ بيۋدجەتىندە شىعىستار كولەمى 10,1 تريلليون تەڭگە بولعان. ونىڭ ىشىندە الەۋمەتتىك سالاعا 5 تريلليون 182 ميلليارد تەڭگە جۇمسالعان. بۇل جالپى شىعىستاردىڭ %51,2 ى دەگەن ءسوز.
«سونىمەن قاتار، تۇرعىن ءۇي-كوممۋنالدىق شارۋاشىلىعىنا 1 تريلليون 380 ميلليارد تەڭگە، اۋىل شارۋاشىلىعىنا 602 ميلليارد تەڭگە، كولىك جانە كوممۋنيكاتسيا سالاسىنا 918 ميلليارد تەڭگە جۇمسالعان»، - دەدى قارجى ءمينيسترى.
