مۇعالىم مارتەبەسىن تاعى ارتتىرۋ ءۇشىن ناقتى شارالار قابىلداۋ قاجەت - دەپۋتات

مۇعالىمدەردىڭ مارتەبەسىن ءارى قاراي قولداۋ، ارتتىرۋ ءۇشىن ناقتى شارالار قابىلدانۋى قاجەت.

بۇل تۋرالى پرەمەر-ءمينيستردىڭ ورىنباسارى تامارا دۇيسەنوۆاعا دەپۋتاتتىق ساۋال جولداعان ماجىلىسمەن جۇلدىز سۇلەيمەنوۆا ايتتى، دەپ حابارلايدى Kazinform.

«كەشە مەملەكەت باسشىسى قاسىم-جومارت كەمەل ۇلى توقايەۆ: «جان- جاقتى جوسپارلاپ، تياناقتى جاسالعان شارۋا ەرتە مە، كەش پە، جەمىسىن بەرەتىنى ءسوزسىز. مىسالى، ءبىز سوڭعى جىلدارى ءبىلىم بەرۋ سالاسىنا باسا ءمان بەرىپ كەلەمىز. ناقتى شەشىمدەر مەن شارالاردىڭ ارقاسىندا مۇعالىم مارتەبەسى الدەقايدا كوتەرىلدى. مەكتەپتەگى ورىن تاپشىلىعىن جويۋ ءۇشىن ارنايى باعدارلاما جۇزەگە اسىرىلۋدا. بيىل جۇزگە جۋىق ءبىلىم وشاعى بوي كوتەردى. قازىرگى تاڭدا وسىنداي اۋقىمدى جۇمىستىڭ ناقتى ناتيجەسى بار. اتاپ ايتقاندا، حالىقارالىق PISA رەيتينگى بويىنشا قازاقستانداعى ورتا ءبىلىمنىڭ ساپاسى ەداۋىر ارتتى. باسقا دا سالالاردا وڭ وزگەرىس بار»، - دەپ القالى جيىندا ءبىلىم ماسەلەسىنىڭ ناتيجەلەرىنە ارنايى توقتالعان بولاتىن.

شىن مانىسىندە، PISA-2022 حالىقارالىق زەرتتەۋلەرىنىڭ ناتيجەلەرىنە سايكەس، قازاقستاندىق وقۋشىلار ماتەماتيكالىق ساۋاتتىلىقتان 425 بالل جيناقتاپ، گرەتسيا، رۋمىنيا، بىرىككەن اراب امىرلىكتەرى وقۋشىلارىمەن تەڭ ءتۇستى. وقۋ ساۋاتتىلىعىنان 386 بالل جيناقتاپ، مالايزيا، ساۋد ارابياسى وقۋشىلارىمەن تەڭ ءبىلىم ساپاسىن كورسەتتى. جاراتىلىس تانۋ باعىتىندا زەرتتەۋدىڭ 2018 -جىلعى ناتيجەلەرىمەن سالىستىرعاندا، كورسەتكىشتەرى 26+ بالعا جوعارىلادى. باستىسى، پاندەميانىڭ سالدارىنان وەسر ەلدەرىنىڭ باسىم كوپشىلىگى ەداۋىر ءبىلىم ساپاسى بويىنشا ۇپايلارىن جوعالتسا، ەلىمىزدە العا ىلگەرىلەۋ بار ەكەندىگىن، ونىڭ ىشىندە ماتەماتيكا 54 ورىننان 46 ورىنعا جانە جاراتىلىستانۋدان 69 ورىننان 49 ورىنعا كوتەرىلگەندىگىمىزدى اتاپ ءوتۋ قاجەت»، - دەدى دەپۋتات ءماجلىستىڭ جالپى وتىرىسىندا.

ونىڭ اتاپ وتۋىنشە، مۇنداي جاقسى ديناميكالىق كورسەتكىش مەملەكەت باسشىسىنىڭ ءبىلىم بەرۋ سالاسىنداعى كەشەندى، جۇيەلى جانە اۋقىمدى رەفورمالارىنىڭ ناتيجەسىندە مۇمكىن بولدى. مىسالى، «ق ر پەداگوگ مارتەبەسى تۋرالى» العاش رەت زاڭ قابىلداندى. ۇستازداردىڭ مارتەبەسى زاڭمەن بەكىتىلدى، پەداگوگتەردى ارتىق تەكسەرۋلەردەن، قىزمەتىنە ءتان ەمەس جۇمىستاردان بوساتتى.

سوڭعى ءتورت جىلدا پەداگوگتەردىڭ ەڭبەكاقىسى ەكى ەسەگە ارتتىرىلدى. بىلىكتىلىك ساناتتارى ءۇشىن ۇستەماقى 30-دان 50 پايىزعا دەيىن ۇلعايتىلدى. مەكتەپ ءبىتىرۋشى ەڭ ۇزدىك تۇلەكتەر «پەداگوگ» ماماندىعىن تاڭدايتىن بولدى، بۇعان دەيىن پەداگوگ ماماندىعىنا وقۋعا ءتۇسۋدىڭ ورتاشا بالى 55 بالل بولسا، بيىل ورتاشا بالل 110 باللعا دەيىن جەتتى. بولاشاق مۇعالىمدەردىڭ شاكىرتاقىسى باسقا ماماندىقتاردان ەداۋىر كوتەرىلدى.

دەگەنمەن، جۇلدىز سۇلەيمەنوۆا قول جەتكىزىلگەن ناتيجەلەرمەن توقتاماۋ قاجەتتىگىن ايتىپ ءبىرقاتار ۇسىنىس جاسادى.

«ءبىرىنشى. قول جەتكىزگەن ناتيجەنى ارتتىرۋعا ارنايى شارالار جوسپارى قابىلدانىپ، بارلىق پەداگوگيكالىق قاۋىمداستىقپەن تالقىلانۋى شارت. PISA زەرتتەۋلەرىنىڭ ناتيجەلەرىن وقۋ-اعارتۋ مينيسترلىگى تولىعىمەن تالداپ، ساراپتاما ناتيجەسىندە «قاتەمەن جۇمىس» ناقتى ادىستەمەلىك ۇسىنىستاردى ازىرلەپ، ونى پەداگوگتارىمىز ءارى قاراي جۇمىستارىندا پايدالانۋى وزەكتى. PISA رەيتينگىسىندەگى الدىنعى قاتارىنداعى سينگاپۋر، گونكونگ، كورەيانىڭ ءبىلىم مازمۇنى جانە ءبىلىم جۇيەسى زەردەلەنىپ، وزىق تاجىريبەلەردى ەنگىزۋ مۇمكىندىكتەرى قاراستىرىلسىن»، - دەدى ول.
ءماجىلىس دەپۋتاتى ەكىنشىدەن، وقۋ ساۋاتتىلىعى بويىنشا ۇكىمەت كىتاپحانا، كىتاپ وقۋ، وقۋعا قۇشتار مەكتەپ دەگەن جوبالارىن كەشەندى نەگىزدە ساپالى جۇزەگە اسىرۋعا ءمان بەرۋ قاجەتتىگىن اتاپ ءوتتى. كىتاپحانا جۇمىسىنىڭ جاڭا مازمۇنى مەن كىتاپحاناشىلار مارتەبەسىن ارتتىرۋ جۇمىسى جۇزەگە اسىرىلۋى قاجەتتىگىن باسا ايتتى.

«ءۇشىنشى. مۇعالىمدەردىڭ مارتەبەسىن ءارى قاراي قولداۋعا، ءارى قاراي ارتتىرۋعا ناقتى شارالار قابىلدانۋى قاجەت. پەداگوگتاردىڭ كاسىبي دامۋى جانە بىلىكتىلىگىن ارتتىرۋ جۇيەسىن جەتىلدىرۋدى قولعا الۋ كەزەك كۇتتىرمەيتىن مىندەت دەپ ويلايمىز. ءتورتىنشى. دامىعان مەملەكەتتەر وقۋ باعدارلامالارىنىڭ مازمۇنىن 4-5 جىلدا وزگەرتىپ، وڭدەپ، جەتىلدىرىپ تۇرادى. ءبىلىم مازمۇنىن قازىرگى جاساندى ينتەللەكت زامانىن تالاپتارىنا ساي وزگەرتۋگە بايلانىستى مەملەكەتتىك جالپىعا مىندەتتى ءبىلىم بەرۋ ستاندارتتارىنا وزگەرىس ەنگىزۋ قاي دەڭگەيدە؟ كەلەسى وقۋ جىلىندا ەنگىزىلىپ باستالا ما؟ ناقتى جوسپار بەكىتىلۋى ءتيىس»، - دەدى دەپۋتات.
بەسىنشىدەن، جۇلدىز سۇلەيمەنوۆا وقۋشىلاردىڭ وقۋ جەتىستىكتەرىن مونيتورينگىلەۋگە - تاۋەلسىز سىرتقى باعالاۋ رەتىندە ءتيىستى قاراجات ءبولىنىپ، ونىڭ ساپالى، ءادىل، اشىق وتۋىنە مينيسترلىك ناقتى شارالار قابىلداۋى كەزەك كۇتتىرمەيتىن ماسەلە ەكەندىگىن تاسا ايتتى.
«ءبىلىم ساپاسىن باعالاۋدىڭ ۇلتتىق جۇيەسىن قۇرۋ بويىنشا كەشەندى شارالار قابىلدانۋى شارت»، - دەدى ول.
اۆتور
مارلان جيەمباي