ماگيسترانتتار مەن دوكتورانتتار قازاقستاندا بريتاندىق ديپلوم الا الادى

Фото: pixabay.com
Фото: pixabay.com

استانا. KAZINFORM - قازاقستاندىق ماگيسترانتتار مەن دوكتورانتتار ساسسەكس ۋنيۆەرسيتەتىنىڭ ديپلومىن بۇدان بىلاي ەلدە ءجۇرىپ-اق الا الادى.

قازاق ۇلتتىق قىزدار پەداگوگيكالىق ۋنيۆەرسيتەتىمەن بىرلەسكەن قوس ديپلوم باعدارلاماسىن ىسكە اسىرۋ بويىنشا كەلىسسوزدەر وتكىزۋ ءۇشىن ۇلى بريتانيادان الماتىعا ارنايى دەلەگاتسيا كەلدى.

مارتەبەلى مەيمانداردى قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گۇلميرا قاناي قارسى الدى. تاراپتار ۇزاق مەرزىمدى ستراتەگيالىق ارىپتەستىك ورناتۋ بويىنشا 3 كۇن قاتارىنان كەزدەسۋلەر وتكىزەدى.

«قوس ديپلوم باعدارلاماسى قازاق ۇلتتىق قىزدار پەداگوگيكالىق ۋنيۆەرسيتەتى مەن ساسسەكس ۋنيۆەرسيتەتى بىرلەسىپ جەڭىپ العان بريتاندىق كەڭەس گرانتىنىڭ اياسىندا ىسكە اسادى. ياعني قازاقستاندىق ماگيسترانتتار مەن دوكتورانتتار ەكى ديپلوم الاتىن بولادى: ءبىرىنشىسى - قازاق ۇلتتىق قىزدار پەداگوگيكالىق ۋنيۆەرسيتەتىنىڭ، ەكىنشىسى - ساسسەكس ۋنيۆەرسيتەتىنىڭ ديپلومى»، - دەپ جازدى عىلىم جانە جوعارى ءبىلىم مينيسترلىگىنەن.

وسى ارىپتەستىك اياسىندا پەداگوگيكا سالاسىندا قوسىمشا ءبىلىم الۋعا مۇمكىندىك بەرەتىن PGCE in Pedagogy and Practice حالىقارالىق باعدارلاماسى دا ىسكە اسادى. سونداي-اق پروفەسسورلار مەن وقىتۋشىلاردىڭ بىلىكتىلىگىن ارتتىراتىن ورتالىق قۇرىلادى. بۇل قازاقستاندىق جانە بريتاندىق جوعارى وقۋ ورىندارى عىلىمدى دامىتۋدا دا بىرلەسەدى دەگەن ءسوز.

ەستەرىڭىزگە سالساق، قازاق ۇلتتىق قىزدار پەداگوگيكالىق ۋنيۆەرسيتەتى بىلتىر جازدا ساسسەكس ۋنيۆەرسيتەتىمەن ءوزارا ىنتىماقتاستىق مەموراندۋمىنا قول قويعان. وسى كەلىسىمنىڭ ارقاسىندا قازاقستاندىق 15 وقىتۋشى مەن دوكتورانت ۇلى بريتانيادا بىلىكتىلىكتى ارتتىرۋ باعدارلاماسىنان ءساتتى وتكەن بولاتىن.

سوڭعى جاڭالىقتار