مايقايىڭداعى اپات: ءتىرى دەيىن دەسەم، ۇيدە جوق، ءولى دەيىن دەسەم، بەيىت جوق
استانا. KAZINFORM - قاڭتاردا مايقايىڭ كەنىشىندە ويىققا قۇلاعان اۆتوبۋستا قالعان ەكى ادامنىڭ تۋىستارى كومەك سۇراپ استاناعا كەلدى. بۇل تۋرالى ك ت ك ارناسى حابارلادى.
اپاتتىڭ بولعانىنا ءۇش ايعا جۋىقتاسا دا، قۇتقارۋشى مەن اۆتوبۋس جۇرگىزۋشىسىنىڭ ءمايىتى ءالى تابىلعان جوق. ال ىزدەۋ جۇمىستارى توقتاپ تۇر. مارقۇمنىڭ جاقىندارى قۇتقارۋ جۇمىستارىن جالعاستىرۋدى تالاپ ەتىپ وتىر. پاۆلودار وبلىسىنىڭ اكىمدىگى مەن جەرگىلىكتى پروكۋراتۋرادان كۇدەر ۇزگەن ولاردىڭ ەندىگى ءۇمىتى پرەزيدەنتتە.
قۇتقارۋشى ايدوس شايمەردەننىڭ ايەلى استاناعا شيىتتەي بالا-شاعاسىن ەرتىپ كەلگەن.
«اسىراۋشىمنان ايىرىلدىم، بەس بالامدى ەندى كىم اسىرايدى. جۇبايىمنىڭ ءمايىتىن تاۋىپ بەرسە، عۇرىپقا ساي جەرلەسەك»، - دەپ كوز جاسىنا ەرىك بەردى.
پاۆلوداردا ىزدەۋ جۇمىستارىن جالعاستىرۋدى سۇراپ، اكىمدىك پەن پروكۋراتۋرانىڭ تابالدىرىعىن توزدىرعان نۇرسۇلۋ ەش شارا قالماعان سوڭ، ۇكىمەتتەن، باس پروكۋراتۋرادان كومەك سۇراپ وتىر.
«ءبىزدى ەستيتىن پەندە جوق. كىشكەنتاي بالالارىمدى الىپ استانانىڭ تورىنە كەلىپ وتىرمىن، الىپ بەرسە ەكەن، شىعارىپ بەرسە ەكەن دەيمىن. ءتىرى ەمەس ەكەنىنە كوندىك قوي، ءتىرى دەيىن دەسەم، ۇيدە جوق، ءولى دەيىن دەسەم، بەيىت باسى جوق»، - دەيدى نۇرسۇلۋ شايمەردەن.
توپىراق استىندا قالعان ەكى ادام ءالى كۇنگە دەيىن اپاتتان قۇتقارۋ قىزمەتىنىڭ جۇمىسشىلارى رەتىندە ەسەپتەلىپ، ولارعا اي سايىن جالاقى تولەنىپ وتىر ەكەن. ءمايىت تابىلماعاندىقتان، قايتىس بولعانى تۋرالى كۋالىك تە جوق. سول سەبەپتى ەكى وتباسىعا وتەماقى تولەنبەگەن، اسىراۋشىسىنان ايىرىلعانىن وتباسى رەتىندە جاردەماقى دا الا المايدى.
اۆتوبۋس جۇرگىزۋشىسى ايىپ تىلەۋبەرگەنوۆتىڭ جاقىندارى ءىستىڭ سوزىلىپ كەتكەنىنە نارازى.
«ءتورت كىسىنىڭ ولىمىنە كومبينات جاۋاپ بەرگىسى كەلمەي، اعامىزدىڭ جۇمىس ورنى، قۇتقارۋشىلارمەن سوتتاسايىن دەپ جاتىر، سولاردى كىنالى قىلعىسى كەلىپ جاتىر. جەر سولاردىكى، ويىلىپ كەتكەن جەر سولاردىڭ قاتەلىكتەرىنەن، سالعىرتتىعىنان بولدى، ونى مويىنداعىسى كەلىپ تۇرعان جوق. «ءبىزدىڭ كىنامىز جوق» دەپ وتىر»، - دەيدى اۆتوبۋس جۇرگىزۋشىسىنىڭ تۋىسى امانگەلدى تىلەۋبەرگەنوۆ.
ىزدەۋ جۇمىستارى قاشان جانداناتىنىن توتەنشە جاعدايلار مينيسترلىگى دە ايتا المادى. قازبا جۇمىسىنىڭ توقتاعانىنا ءبىر اي وتسە دە، ساراپتاما جاسالماعان.
«ەكى جاق ساراپتاما جۇرگىزىپ، قۇتقارۋشىلار ءۇشىن قازبا جۇمىستارى قانشالىقتى قاۋىپسىز ەكەنىنە شەشىم قابىلداۋى ءتيىس. ساراپشىلار قاۋىپ جوق دەپ شەشسە، ارينە، ىزدەۋ جۇمىستارى قايتا جاندانادى»، - دەيدى ت ج م ۆيتسە-ءمينيسترى باۋىرجان سىزدىقوۆ.
يندۋستريا ءمينيسترى كەن ورنىندا وندىرىستىك قاۋىپسىزدىككە قارجى از بولىنەتىنىن مويىندادى.
«بۇل جاعدايدى پاۆلودار اكىمىمەن تالقىلادىق، ينۆەستورعا قاتىستى ناقتى شەشىمدەر قابىلدايمىز. بۇعان دەيىن ىستەگەنىمىزدەي، اكسيونەرمەن تىكەلەي ديالوگ قۇرماقپىز. ول كەنىشتەگى وندىرىستىك قاۋىپسىزدىك پەن كەن ورنىن يگەرۋدى ءوز موينىنا الادى نەمەسە ناقتى وسى ينۆەستوردىڭ جەر قويناۋىن پايدالانۋ قۇقىعى ماسەلەسىن قايتا قارايتىن بولامىز. ءبىر شەشىمگە كەلەمىز»، - دەدى يندۋستريا جانە ينفراقۇرىلىمدىق دامۋ ءمينيسترى قانات شارلاپايەۆ.
اۆتوبۋسپەن بىرگە توپىراق استىندا قالعان ەكى ادام ءالى جوعالعاندار ساناتىندا. ال ولاردىڭ وتباسى زارداپ شەگۋشى رەتىندە تانىلماعان. پاۆلوداردان كومەك سۇراپ كەلگەن قاۋىمدى ۇكىمەتتەگىلەر باس پروكۋراتۋراعا، ونداعىلار اينالىپ كەلىپ وبلىس پروكۋرورىنا قايتا باعىتتاپتى.
