مايقاپشاعاي تراسساسىندا ورتاشا جىلدامدىقتى باقىلاۋ جۇيەسى ىسكە قوسىلدى
استانا. KAZINFORM - رەسپۋبليكالىق ماڭىزى بار ومبى-مايقاپشاعاي اۆتوجولىنىڭ پاۆلودار-سەمەي- قالباتاۋ باعىتى بويىنشا قوزعالىس جىلدامدىعىن باقىلاۋعا ارنالعان جۇيە جۇمىس ىستەپ تۇر، دەپ حابارلايدى اباي وبلىسىنىڭ پوليتسيا دەپارتامەنتى.
ءتارتىپ ساقشىلارى جۇرگىزۋشىلەرگە وسى ۋچاسكەدە سەگىز اركا ورناتىلعانىن ەسكەرتەدى.
- ولار زاماناۋي «ZEREK-2 اپپاراتتىق- باعدارلامالىق كەشەنىمەن جابدىقتالعان. بۇل قۇرىلعىلار كولىك قۇرالدارىنىڭ ءبىر نۇكتەدەن ەكىنشىسىنە دەيىنگى ورتاشا جىلدامدىعىن ەسەپتەپ، تىركەيدى. سوندىقتان جۇرگىزۋشىنىڭ كامەرا الدىندا جىلدامدىقتى ۋاقىتشا تومەندەتۋى كومەكتەسپەيدى - جۇيە جالپى ءجۇرىپ وتكەن ارالىقتاعى جىلدامدىقتى نەگىزگە الادى، - دەلىنگەن حابارلامادا.
بۇگىنگى تاڭدا ورتاشا جىلدامدىقتى اسىرۋ بويىنشا 1000-نان استام قۇقىقبۇزۋشىلىق تىركەلگەن.
- مۇنداي زاڭبۇزۋشىلىقتار ق ر اكىمشىلىك قۇقىق بۇزۋشىلىقتار تۋرالى كودەكسىنىڭ 592-بابىنا سايكەس قارالادى. جىلدامدىقتى اسىرۋ دەڭگەيىنە بايلانىستى ايىپپۇل كولەمى 5-تەن 40-قا دەيىنگى ايلىق ەسەپتىك كورسەتكىشتەردى (ا ە ك) قۇرايدى. ءبىر جىل ىشىندە قايتالانعان بۇزۋشىلىقتار جاعدايىندا ايىپپۇل مولشەرى 60 ا ە ك- كە دەيىن ۇلعايۋى مۇمكىن. وسىلايشا، جىلدامدىق رەجيمىن ساقتاماۋ - تەك قالتاعا سالماق سالماي، جۇرگىزۋشى كۋالىگىنەن ايىرىلۋ قاۋپىن دە ارتتىرادى، - دەپ ءتۇسىندىردى ۆەدومستۆو.
ايتا كەتەيىك، «ZEREK-2» جۇيەسىنىڭ ەنگىزىلۋى جازالاۋ قۇرالى ەمەس. بۇل تەحنولوگيانىڭ باستى ماقساتى - جول قوزعالىسى قاۋىپسىزدىگىن قامتاماسىز ەتۋ، اپاتتىلىقتى ازايتۋ، قۇقىقبۇزۋشىلىقتاردىڭ الدىن الۋ جانە جۇرگىزۋشىلەردىڭ جاۋاپكەرشىلىك مادەنيەتىن قالىپتاستىرۋ. مۇنداي جۇيەلەر جۇمىس ىستەپ تۇرعان قازاقستاننىڭ باسقا وڭىرلەرىنىڭ تاجىريبەسى كورسەتكەندەي، ورتاشا جىلدامدىقتى باقىلاۋ جول-كولىك وقيعالارىنىڭ ناقتى تومەندەۋىنە اسەر ەتەدى.
اباي وبلىسى پوليتسيا دەپارتامەنتى بارلىق جۇرگىزۋشىلەرگە جول قوزعالىسى ەرەجەلەرى مەن جىلدامدىق شەكتەۋلەرىن ساقتاۋعا شاقىرادى. جول قاۋىپسىزدىگى - بارشانىڭ ورتاق جاۋاپكەرشىلىگى، ءاربىر جۇرگىزۋشى مۇقياتتىلىق، ءتارتىپ پەن باسقا جول قوزعالىسىنا قاتىسۋشىلارعا دەگەن قۇرمەت ارقىلى ورتاق ىسكە ءوز ۇلەسىن قوسا الادى.
بۇدان بۇرىن اباي وبلىسىندا قىزمەتكەرلەرىن روگاتكامەن اتقان پوليتسيا باستىعى جۇمىستان قۋىلعانىن جازعان ەدىك.
