ماسىموۆتىڭ ۇيىندەگى قىمبات بۇيىمدار ساۋداعا شىعارىلدى

استانا. KAZINFORM - وتانعا وپاسىزدىق جاساعانى ءۇشىن سوتتالعان بۇرىنعى ۇ ق ك باسشىسى كارىم ماسىموۆتەن تاركىلەنگەن ءبىرقاتار قۇندى زات ساتىلىمعا قويىلدى. بۇل تۋرالى Ertenmedia حابارلادى.

اكتيۆتەردى قايتارۋ جونىندەگى باسقارۋشى كومپانيا ارنايى ەلەكتروندى پلاتفورمادا ەرەكشە لوتتاردى جاريا ەتتى. ساۋداعا قويىلعان زاتتاردىڭ اراسىندا اشەكەي بۇيىمدار، سۋىق قارۋ تۇرلەرى مەن سيرەك كەزدەسەتىن كوللەكتسيالىق بۇيىمدار بار.

ماسەلەن، Montegrappa Italia ماركالى قالام 628 مىڭ تەڭگەگە باعالانسا، بۇعى مۇيىزىنەن جاسالعان قىلىش 582 مىڭ تەڭگە تۇرادى. كاۆكاز قانجارى 198 مىڭ تەڭگەگە ۇسىنىلعان. سونداي-اق داماسك بولاتىنان جاسالىپ، قولتىراۋىننىڭ باسىنا ۇقساتىپ جاسالعان پىشاق 95 مىڭ تەڭگەگە ساتىلۋدا.

لوتتار اراسىندا ەڭ قىمبات بۇيىم - II ەليزاۆەتانىڭ بەينەسى سالىنعان، نومينالى 200 دوللار بولاتىن كوللەكتسيالىق مونەتا. ونىڭ باعاسى - 3,1 ميلليون تەڭگە.

بۇل زاتتاردىڭ بارلىعى استاناداعى كارىم ماسىموۆكە تيەسىلى بولعان ەليتالى زاۋلىم ۇيدەن تاركىلەنگەن. ايتا كەتەيىك، اتالعان جىلجىمايتىن مۇلىككە قاتىستى بۇعان دەيىن بەلگىلى كاسىپكەر كەڭەس راقىشيەۆتىڭ دا ەسىمى اتالعان بولاتىن.

ەسكە سالا كەتەيىك، بۇعان دەيىن Ertenmedia ماسىموۆتىڭ ناپولەوننىڭ ءوز قولىمەن جازعان حاتتارىن شامامەن 100 مىڭ فۋنت ستەرلينگكە ساتىپ العانى تۋرالى حابارلاعان ەدى.