ماسەلە حالىقتىڭ ءدىندارلىعىندا ەمەس، ءدىني ساۋاتسىزدىقتا - ايدا بالايەۆا

ەلىمىزدە دەسترۋكتيۆتى سيپاتتاعى ماتەريالداردى انىقتاۋ بويىنشا تاۋلىك بويى مونيتورينگ جۇرگىزىلەدى، دەپ حابارلايدى قازاقپارات ءتىلشىسى.

«ءدىن ماسەلەلەرى وتە وزەكتى بولىپ تۇر. قىركۇيەك ايىنىڭ باسىندا مەن حيدجاب كيۋ سۇراقتارى بويىنشا تۇسىنىكتەمە بەرگەن ەدىم. ماسەلە حالىقتىڭ ءدىندارلىعىندا ەمەس، ءدىني ساۋاتسىزدىقتا. ارينە، بۇگىندە ءبىز ءداستۇرلى ەمەس ءدىني اعىمداردىڭ بەلسەندى جۇمىس ىستەپ جاتقانىن كورىپ وتىرمىز. سوندىقتان بۇل باعىتتا مينيسترلىكتىڭ جۇمىسى ءۇش باعىتتا جۇرگىزىلەدى»، - دەدى مادەنيەت جانە اقپارات ءمينيسترى ايدا بالايەۆا ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

مينيستر كەلتىرگەن مالىمەتكە سايكەس، دەسترۋكتيۆتى سيپاتتاعى ماتەريالداردى انىقتاۋ بويىنشا تاۋلىك بويى مونيتورينگ جۇرگىزىلەدى. اسىرەسە الەۋمەتتىك جەلىلەر مەن ينتەرنەت كەڭىستىگىندە.

«1- قاڭتاردان قىركۇيەك ايىنىڭ سوڭىنا دەيىن ينتەرنەتتە لاڭكەستىك جانە ءدىني ەكسترەميزم قاعيداتتارىن ناسيحاتتاۋعا باعىتتالعان 14860 ماتەريال انىقتالدى. بۇل دەگەنىمىز ءدىني اعىمدار جۇمىسىنىڭ كۇشەيۋىن بىلدىرەدى. ارينە، ءبىز دەپۋتاتتاردىڭ ساۋالىن مۇقيات تىڭداپ، زەردەلەيمىز. بۇل باعىتتا ءبىز «ءدىن تۋرالى» زاڭنىڭ جەكەلەگەن نورمالارىن قايتا قاراۋ ءۇشىن جۇمىس ىستەيتىن بولامىز»، - دەيدى ول.