ماسكەۋدەگى تەراكت: رەسەيلىك تەرگەۋشىلەر كۇدىكتىلەردىڭ وتباسىنان جاۋاپ الۋ ءۇشىن تاجىكستانعا باردى

دۋشانبە. قازاقپارات - 26-ناۋرىزدا رەسەيلىك تەرگەۋشىلەر Crocus City Hall عيماراتىنا جاسالعان شابۋىلعا كۇدىكتى ءتورت ادامنىڭ وتباسى مۇشەلەرىنەن جاۋاپ الۋ ءۇشىن تاجىكستانعا باردى. بۇل تۋرالى Reuters اگەنتتىگى تاجىكستاننىڭ قاۋىپسىزدىك قىزمەتىندەگى ءۇش دەرەككوزگە سىلتەمە جاساپ حابارلادى.

اشىق تۇسىنىكتەمە بەرۋگە رۇقساتى جوق دەرەككوزدەردىڭ ايتۋىنشا، تاجىكستان قاۋىپسىزدىك كۇشتەرى وتباسىلاردى ۆاحدات پەن حيسار قالالارىنان جانە رۋداكي اۋدانىنان ەل استاناسى دۋشانبەگە اكەلگەن.

اقپارات كوزدەرىنىڭ حابارلاۋىنشا، تاجىكستانداعى «كروكۋستاعى» تەراكتىگە قاتىستى تەرگەۋ جۇمىستارىنىڭ بارىسى مەملەكەت باسشىسى ەمومالي راحموننىڭ «جەكە باقىلاۋىندا».

اقپارات ءۇشىن، تاجىكستان پرەزيدەنتى كەشە، 25-ناۋرىزدا «كروكۋستاعى» شابۋىلدى «قورقىنىشتى وقيعا» دەپ اتاپ، اتا-انالاردى بالالارىنىڭ تاربيەسىنە كوبىرەك كوڭىل بولۋگە شاقىردى.

اۆتور
جاراسقان نۇرىبايەۆ