ماسكەۋدە وقىپ جۇرگەن ق ر ازاماتتارى جاپا شەككەن جوق - ساياسات نۇربەك

استانا. KAZINFORM - ماسكەۋدەگى تەراكت كەزىندە وندا وقىپ جۇرگەن قازاقستاندىق ازاماتتار جاپا شەككەن جوق، دەپ حابارلايدى ق ر عىلىم جانە جوعارى ءبىلىم ءمينيسترى ساياسات نۇربەك.

«22- ناۋرىزدا ماسكەۋ وبلىسىنداعى Crocus City Hall كونسەرت زالىندا تەراكت بولدى.

رەسەي فەدەراتسياسىندا «بولاشاق» جانە «500 عالىم» باعدارلاماسى بويىنشا بۇگىندە 32 قازاقستاندىق ازامات ءبىلىم الۋدا، 24 ستيپەنديات ماسكەۋدە. ولاردىڭ ەشقايسىسى زارداپ شەككەن جوق. بارلىق ستيپەندياتتار بايلانىسقا شىقتى»، - دەپ جازدى مينيستر تەلەگرام ارناسىندا.

بۇعان دەيىن حابارلانعانداي، بەلگىسىز بىرەۋلەر ماسكەۋ تۇبىندەگى كراسنوگورسك قالاسىنداعى كروكۋس سيتي حول عيماراتىندا وق جاۋدىرعان.

كۋاگەرلەردىڭ ايتۋىنشا، قىلمىسكەرلەر كەشكى ساعات 20:30 شاماسىندا، كونسەرت باستالار الدىندا نەگىزگى پودەزد ارقىلى عيماراتقا كىرىپ، كەلۋشىلەر مەن كۇزەتشىلەرگە بىردەن وق اتقان. سودان ءۇش-ءتورت ادام كونسەرت زالىنا كىرىپ، كورەرمەندەردى اتىپ، «مولوتوۆ كوكتەيلدەرىن» لاقتىرا باستاعان. وسىدان كەيىن شابۋىل جاساعاندار قاشىپ كەتكەن.

رەسەيدىڭ دەنساۋلىق ساقتاۋ مينيسترلىگى لاڭكەستىك ارەكەتتەن زارداپ شەككەن 145 ادامنىڭ ءبىرازىنىڭ ءتىزىمىن جاريالادى.

قايعىلى وقيعاعا بايلانىستى قازاقستان ازاماتتارى ءۇشىن مىنا سەنىم تەلەفونى بويىنشا جەدەل جەلى ىسكە قوسىلدى: 89258977114.

ق ر سىرتقى ىستەر مينيسترلىگى حابارلاعانداي، رەسەيدەگى تەراكتىدە قازا تاپقاندار مەن زارداپ شەككەندەر اراسىندا قازاقستاندىقتار بار ەكەنى تۋرالى اقپارات جوق.