ماسكەۋدە كوپقاباتتى ۇيدە جارىلىس بولىپ، ادامدار قازا تاپتى

استانا. KAZINFORM - ماسكەۋدىڭ وڭتۇستىك- باتىسىندا گەنەرال تيۋلەنيەۆ كوشەسىندەگى 39-تۇرعىن ۇيدە جارىلىس بولىپ، ارتى ورتكە ۇلاستى. توتەنشە جاعداي سالدارىنان ەكى ادام قازا تاپتى، دەپ حابارلايدى ت ا س س.

قازا تاپقاندار توعىزىنشى قاباتتىڭ بالكونىنان تابىلدى.

رەسەي ت ج م مالىمەتىنشە، التى ادام زارداپ شەكتى. ءبىر ەرەسەك ادامنىڭ جاعدايى اۋىر، قالعاندارىنىڭ جاعدايى ورتاشا اۋىر دەپ باعالانىپ وتىر. ولار ءتورت ستاتسيونارعا جەتكىزىلدى. ورتەنىپ جاتقان پاتەردەن كورشىلەر ءبىر بالانى قۇتقاردى، ول پاتەردە تۇرعاندار اراسىنان امان قالعان جالعىز ادام.

جارىلىس وشاعى توعىزىنشى قاباتتاعى پاتەردە بولدى. ءورت سەگىزىنشى جانە توعىزىنشى قاباتتارداعى ەكى پاتەردەن شىققان. بۇل قاباتتاردىڭ اراسىنداعى جابىن وپىرىلعان، سىرتقى قابىرعالارى جوق.

ءورت اۋماعى 100 شارشى مەتر.

عيمارات تۇرعىندارىنىڭ ءبىر بولىگى ەۆاكۋاتسيالاندى، ولار جاقىن جەردە قۇرىلعان ۋاقىتشا ورنالاستىرۋ پۋنكتىنە جىبەرىلىپ جاتىر. «موسگورترانس» ەۆاكۋاتسيالانعان تۇرعىنداردى جىلىتۋ ءۇشىن ەكى ۇلكەن اۆتوبۋس جىبەردى.

- بۇل ۇيدە 1,5 جىل بۇرىن ءورت بولعان، جانە ءورتتىڭ شىعۋىنا سەبەپ بولعان تۇرعىندارمەن سوت ءىسى ءالى دە جالعاسۋدا، - دەپ مالىمدەدى ءۇيدىڭ ءبىر تۇرعىنى.

وقيعا فاكتىسى بويىنشا قىلمىستىق ءىس قوزعالدى.

اۆتور

زارينا تۋعانبايەۆا