ماسك ترامپ اكىمشىلىگىنەن كەتتى

استانا. KAZINFORM - ميللياردەر، ا ق ش ۇكىمەتىنىڭ تيىمدىلىگى دەپارتامەنتىنىڭ (DOGE) باسشىسى يلون ماسك ا ق ش اكىمشىلىگىندەگى قىزمەت مەرزىمى اياقتالىپ جاتقانىن حابارلادى، دەپ جازدى BBC.

يلون ماسك پرەزيدەنت دونالد ترامپقا العىسىن ءبىلدىردى.

- مەنىڭ ارنايى مەملەكەتتىك قىزمەتكەر رەتىندەگى مەرزىمىم اياقتالىپ جاتقاندا، مەن پرەزيدەنت دونالد ترامپقا ماعان ىسىراپشىل شىعىنداردى ازايتۋعا مۇمكىندىك بەرگەنى ءۇشىن العىس ايتقىم كەلەدى، - دەپ جازدى ول ءوزىنىڭ X الەۋمەتتىك جەلىدەگى اككاۋنتىندا.

«DOGE ميسسياسى ۋاقىت وتە كەلە كۇشەيە تۇسەدى، ويتكەنى ول بارلىق مەملەكەتتىك ورگانداردىڭ ءومىر سالتىنا اينالادى» ، - دەپ قوستى ول.

ماسك بىردە CBS- گە بەرگەن سۇقباتىندا ترامپتىڭ «ۇلكەن، ادەمى» سالىق جانە بيۋدجەتتىك زاڭ جوباسىنان كوڭىلى قالعانىن ايتتى. ونىڭ ايتۋىنشا، بۇل زاڭ ماسكتىڭ شىعىنداردى قىسقارتۋ ارەكەتتەرىنە نۇقسان كەلتىرەدى ءارى بيۋدجەت تاپشىلىعىنىڭ ارتۋىنا اكەلەدى.

ترامپ قىزمەتىنە كىرىسكەننەن كەيىن ماسك «ارنايى مەملەكەتتىك قىزمەتكەر» بولىپ تاعايىندالدى، بۇل وعان ۇكىمەتتە جىلىنا 130 كۇن جۇمىس ىستەۋگە مۇمكىندىك بەردى. 20 - قاڭتارداعى ۇلىقتاۋ راسىمىنەن باستاپ ەسەپتەسەك، مامىردىڭ اياعىندا 130 كۇن بىتەدى. Reuters اقپارات كوزدەرىنە سىلتەمە جاساي وتىرىپ، ماسكتىڭ كەتۋىن جاريالاماس بۇرىن ترامپپەن رەسمي سويلەسپەگەنىن حابارلادى. سونىمەن بىرگە، ولاردىڭ اقپاراتى بويىنشا، شەشىم «جوعارى دەڭگەيدە» قابىلدانعان.

ءساۋىر ايىندا ماسك ءوز كومپانيالارىندا كوبىرەك جۇمىس ىستەۋدى جانە اپتاسىنا ءبىر نەمەسە ەكى كۇندى DOGE گە ارناۋدى جوسپارلاعانىن ايتتى.