ماس كۇيدە رۋلگە وتىرعان اقتوبەلىك ەكس-دەپۋتاتقا سوت سىرتتاي ۇكىم شىعاردى

 اقتوبە قالالىق ءماسليحاتىنىڭ ەكس-دەپۋتاتى سانيا مۇراتوۆا اقىرى سوتقا قاتىسپادى. سوت 15 تاۋلىككە قاماۋعا الۋ جانە جۇرگىزۋشى كۋالىگىنەن 7 جىلعا ايىرۋ قاۋلىسىن سىرتتاي شىعاردى، دەپ حابارلايدى Kazinform. 

اقتوبە قالالىق ءماسليحاتىنىڭ بۇرىنعى دەپۋتاتى رۋلگە ماس كۇيىندە وتىرعانى ءۇشىن سوت الدىنا كەلىپ، جاۋاپ بەرۋى ءتيىس بولاتىن. الايدا 5-قىركۇيەكتە تولتىرىلعان حاتتاماعا قاۋلى شىعارۋ بۇگىنگە دەيىن سوزىلىپ كەلدى. ازىرگە ونىڭ ناقتى سەبەبىن ەشكىم بىلمەيدى. سوتقا ءوزى دە، قورعاۋشىسى دا قاتىسپادى، قانداي دا ءبىر سەبەبى بار-جوعىن ايتپادى. سۋديا قايىرجان الاش ۇلى حاتتاما تولتىرعان پوليتسيا قىزمەتكەرىنەن سۇراعان كەزدە ول ۇيىنە بارعانىن، الايدا تاپپاعانىن ايتتى. سوت وتىرىسى كەزىندە اقتوبە قالاسىنىڭ پروكۋرورى داۋلەت تۋلەۋف 15 تاۋلىككە قاماۋعا الۋدى سۇرادى.

«ا ق ب ت ك 608-بابى 1-بولىگىمەن كىنالى دەپ تانىلىپ، ونى 15 تاۋلىككە اكىمشىلىك قاماققا الىپ جانە 7 -جىل مەرزىمگە كولىك قۇرالىن باسقارۋ قۇقىعىنان ايىرۋدى سۇرايمىن»، - دەدى داۋلەت تۋلەۋف. كەيىن سۋديا قايىرجان الاش ۇلى قاۋلىنى وقىدى.

- سانيا مۇراتوۆانىڭ كىناسى حاتتامامەن، مەديتسينالىق ساراپتاما قورىتىندىسىمەن، بەينەجازبامەن تولىق دالەلدەندى. وسى باپتىڭ سانكسياسىنا سايكەس سانيا مۇراتوۆانى 15 تاۋلىككە قاماققا الۋ جانە جۇرگىزۋ كۋالىگىنەن 7 جىلعا ايىرۋ تۋرالى قاۋلى شىقتى. قاۋلى دەرەۋ ورىنداۋعا جاتادى. اكىمشىلىك قاماققا الۋ مەرزىمى اقتوبە وبلىستىق پ د جۇكتەلسىن، - دەدى سۋديا قايىرجان الاش ۇلى.

سوت تا، پروكۋرور دا سوت وتىرىسىنا قاتىسپاي قالعان سانيا مۇراتوۆانىڭ ءىسى تۋرالى قانداي دا پىكىر ايتۋدان باس تارتتى.

ەسكە سالساق، قالا ءماسليحاتىنىڭ دەپۋتاتى بولىپ تۇرعان كەزدە ءسانيا مۇراتوۆا ماس كۇيدە كولىك جۇرگىزگەنى ءۇشىن ۇستالعان بولاتىن.

كەيىن ول دەپۋتاتتىق مانداتىنان ءوز ەركىمەن باس تارتتى.