ماس كۇيدە رۋلگە وتىرعان اقتوبە دەپۋتاتى سوت وتىرىسىنا تاعى كەلمەي قالدى

اقتوبە سوتىندا قالالىق دەپۋتات ءسانيا مۇراتوۆاعا قاتىستى اكىمشىلىك قۇقىقبۇزۋشىلىق تۋرالى كودەكستىڭ 596-بابى 3-بولىگىمەن قوزعالعان ءىس قارالدى.

شەشىم سىرتتاي شىعارىلىپ، ول جۇرگىزۋشى كۋالىگىنەن 6 ايعا ايىرىلدى، دەپ حابارلايدى قازاقپارات ءتىلشىسى.

جاۋاپكەر سانيا مۇراتوۆا سوتتىڭ بولاتىن كۇنىن، ۋاقىتىن بىلە تۇرا سوت وتىرىسىنا قاتىسپادى. دەگەنمەن، اقتوبە قالاسىنىڭ اكىمشىلىك قۇقىقبۇزۋشىلىقتار جونىندەگى مامانداندىرىلعان اۋدانارالىق سوتىندا ءىس قارالىپ، سۋديا د. حاميەۆ سىرتتاي شەشىم شىعاردى.

قالا ءماسليحاتىنىڭ دەپۋتاتى ءسانيا مۇراتوۆاعا قاتىستى اكىمشىلىك قۇقىقبۇزۋشىلىق تۋرالى كودەكستىڭ «كولىك قۇرالىن جولدىڭ ءجۇرۋ بولىگىندە ورنالاستىرۋ، قارسى ءجۇرىپ ءوتۋ نەمەسە باسىپ وزۋ قاعيدالارىن بۇزۋ» (596-باپ) جانە «كولىك قۇرالىن ماس كۇيىندە جۇرگىزۋ» (608-باپ) باپتارى بويىنشا حاتتامالار تولتىرىلعان بولاتىن.

بۇگىنگى سوت وتىرىسىندا دەپۋتاتتىڭ 596-باپتىڭ 3-بولىگىندە كورسەتىلگەن قۇقىقبۇزۋشىلىعى قارالدى. وندا س. مۇراتوۆانىڭ جول ەرەجەسىن بۇزعانىن قۇجاتقا ءتۇسىرىپ، حاتتاما تولتىرعان پوليتسيا قىزمەتكەرى ءمان-جايدى ايتىپ بەردى.

«بيىل 5- قىركۇيەك كۇنى ساعات 7:00 شاماسىندا ازاماتشا مۇراتوۆا سانيا بۇلقايىر قىزى اقتوبە قالاسىنداعى ءاليا مولداعۇلوۆا مەن ساڭكىباي باتىر داڭعىلدارىنىڭ قيىلىسىندا Lexus كولىگىمەن 6 جولاقتى جول بەلگىسى بار جولدا قارسى باعىتقا شىعىپ كەتتى. جانە «تۇتاس ەكى سىزىقتى» باسىپ ءوتتى. سول جەردە حاتتاما تولتىرىلدى. حاتتامامەن كەلىسىپ، كەلىسپەيتىنىن سۇرادىق. ول تولىق كەلىسەتىنىن ايتتى جانە ءوزى قول قويدى»، - دەدى اقتوبە قالاسى پاترۋلدىك پوليتسيا باتالونىنىڭ ينسپەكتورى نۇرجاس مۇسىرەپ.

سوت شەشىمىمەن دەپۋتات بىرنەشە اي كولىك رۋلىنە وتىرا المايتىن بولدى.

«ق ر اكىمشىلىك قۇقىقبۇزۋشىلىق تۋرالى كودەكستىڭ 596-بابى 3-بولىگىندە كورسەتىلگەن قۇقىقبۇزۋشىلىق جاساعانى ءۇشىن وعان 6 اي مەرزىمگە كولىك جۇرگىزۋ قۇقىعىنان ايىرۋ جازاسى قولدانىلادى»، - دەدى سۋديا.

ەسكە سالساق، قالا ءماسليحاتىنىڭ دەپۋتاتى ءسانيا مۇراتوۆا ماس كۇيدە كولىك جۇرگىزگەنى ءۇشىن ۇستالعان بولاتىن.

كەيىن ول دەپۋتاتتىق مانداتىنان ءوز ەركىمەن باس تارتتى.

608-باپقا قاتىستى ءىستى قاراۋ 21- قىركۇيەك كۇنى وتكەن بولاتىن. الايدا، حالىق قالاۋلىسى سول كۇنى دە سوت وتىرىسىنا كەلمەي قالدى. سۋديا كەلەسى وتىرىسقا س. مۇراتوۆانى كۇشتەپ جەتكىزۋ تۋرالى ۇيعارىم شىعاردى.