ماريا مۋدرياك قىتايدا ونەر كورسەتەدى
استانا. KAZINFORM - قازاقستاندىق وپەرا ءانشىسى ماريا مۋدرياك قىتايدا ۆ. موتسارتتىڭ «فيگارونىڭ ۇيلەنۋى» وپەراسىنداعى گرافينيا الماۆيۆا پارتياسىن العاش رەت ورىندايدى، دەپ حابارلايدى ق ر مادەنيەت جانە اقپارات مينيسترلىگىنىڭ باسپاءسوز قىزمەتى.
قويىلىمدار 15، 17 جانە 19-شىلدە كۇندەرى بەيجىڭدەگى ۇلتتىق ورىنداۋشىلىق ونەر ورتالىعىندا وتەدى.
ال 8-10-تامىز ارالىعىندا ءانشى سيان قالاسىنداعى Grand Opera House ساحناسىندا ونەر كورسەتەدى.
بۇل -ماريا مۋدرياكتىڭ قىتايعا بەسىنشى گاسترولدىك ساپارى. بۇعان دەيىن وسى وپەرادا سيۋزاننانىڭ پارتياسىن ورىنداعان ءانشى بيىل العاش رەت گرافينيا الماۆيۆانىڭ ءرولىن سومدايدى. بۇل كەيىپكەردىڭ تەرەڭ ءارى قاراما-قايشى سەزىمدەرى تۋىندىعا ەرەكشە درامالىق اسەر مەن ەموتسيالىق تەرەڭدىك بەرەدى.
ايتا كەتەيىك، ماريا مۋدرياك قازاقستاندا دۇنيەگە كەلگەن. ول بالا كەزىنەن-اق ءان ايتۋعا قىزىعىپ، 10 جاسىنان باستاپ يتاليادا ۆوكالدان ءدارىس العان. سول جەردە لا سكالا تەاترىنىڭ بالالار حورىندا شىعارماشىلىق جولىن باستاپ، كەيىن ميلانداعى دج. ۆەردي اتىنداعى كونسەرۆاتوريانى ءتامامدادى. قازىر ول الەمنىڭ جەتەكشى وپەرا ساحنالارىندا ونەر كورسەتىپ ءجۇر جانە الەمدەگى ەڭ ۇزدىك ون سوپرانونىڭ ءبىرى سانالادى.
ءانشىنىڭ قىتايعا ساپارى - ونىڭ حالىقارالىق مانسابىنداعى تاعى ءبىر ماڭىزدى قادام. بۇل گاسترولدىك ساپاردا قىتايلىق كورەرمەن ونەرپازدىڭ قايتالانباس زور داۋىسى مەن اكتەرلىك شەبەرلىگىن تاماشالاي الادى.
