ماروككو 7,2 ميلليون تۋريست قابىلداپ، جاڭا رەكورد ورناتتى
استانا. قازاقپارات - 2025 -جىلدىڭ مامىرىنا دەيىن ماروككو 7,2 ميلليون تۋريست قابىلداپ، وتكەن جىلدىڭ وسى كەزەڭىمەن سالىستىرعاندا كورسەتكىشتى 22 پايىزعا ارتتىردى، دەپ حابارلايدى AZƏRTAC.
ماروككونىڭ تۋريزم، قولونەر، الەۋمەتتىك جانە ىنتىماقتاستىق ەكونوميكاسى مينيسترلىگى بۇل كورسەتكىش ەلدىڭ الەمدىك تۋريزم نارىعىنداعى جەتەكشى ورىندارىن راستايتىنىن جانە سالانى دامىتۋعا باعىتتالعان ستراتەگيالىق شارالاردىڭ تيىمدىلىگىن دالەلدەيتىنىن مالىمدەدى.
مينيستر فاتيما زاحرا امموردىڭ ايتۋىنشا، بۇل ءوسىم ماروككونىڭ تۋريستىك باعىت رەتىندەگى تارتىمدىلىعىنىڭ ارتىپ كەلە جاتقانىن كورسەتەدى. ول 2023- 2026 -جىلدارعا ارنالعان تۋريزم جول كارتاسىنىڭ جۇزەگە اسىرىلۋىمەن تىعىز بايلانىستى. اتالعان قۇجاتتا اۋە قاتىناسىن جاقسارتۋ، جارناما ناۋقاندارىن كۇشەيتۋ جانە تۋريستىك ۇسىنىستاردىڭ ءار الۋاندىعىن ارتتىرۋعا باعىتتالعان ينۆەستيتسيالاردى ىنتالاندىرۋ سەكىلدى باسىم باعىتتار قامتىلعان.
امموردىڭ ايتۋىنشا، بۇل وڭ ناتيجە ماروككونىڭ 2030 -جىلعا دەيىن 26 ميلليون تۋريست قابىلداۋ جوسپارىنىڭ ءساتتى جۇزەگە اسۋىنا سەنىمدىلىك بەرەدى.
اۆتور
نازىم بولەسوۆا
