مارالدىدا 100 گە جۋىق ادام فابريكا اۋماعىندا توبەلەس شىعارعان
وسكەمەن. KAZINFORM - شىعىس قازاقستان وبلىسى كۇرشىم اۋدانى مارالدى اۋىلىندا 100 گە جۋىق ادام فابريكا اۋماعىندا توبەلەس شىعارعان.
ش ق و اقپارات ورتالىعىنىڭ حابارلاۋىنشا، مارالدى اۋىلىندا «بايتاق» پارتياسىنىڭ وكىلى مەن ءبىر توپ ادام التىن ءوندىرۋ فابريكاسىنىڭ قۇرىلىسىنا قارسىلىق ءبىلدىرىپ، رۇقساتسىز جينالىس وتكىزگەن. جينالىس اياقتالعاننان كەيىن 100 گە جۋىق مارالدى تۇرعىنى فابريكا قۇرىلىسىن توقتاتۋ تۋرالى بەينەۇندەۋ ءتۇسىرۋ ءۇشىن قۇرىلىس ورنىنا كەلىپ، ارى قاراي ولار فابريكا اۋماعىنا كىرگەن.
«كاسىپورىن باسشىلىعىنىڭ مالىمەتى بويىنشا ولاردىڭ قىزمەتكەرلەرى دەنە جاراقاتىن الىپ، ماتەريالدىق شىعىنعا ۇشىراعان. جەكە قاۋىپسىزدىكتى قامتاماسىز ەتۋ ءۇشىن كاسىپورىننىڭ قىزمەتكەرلەرى مەن كۇزەتشىلەرى كاسىپورىن اۋماعىنان كەتۋگە ءماجبۇر بولدى. پوليتسيا جانە سوبر قىزمەتكەرلەرى جينالعانداردى قۇقىقتىق ءتارتىپتى ساقتاۋعا شاقىرىپ، زاڭنامانى ءتۇسىندىردى، بۇل رەتتە ولارعا كۇش قولدانىلمادى، - دەلىنگەن اقپاراتتا.
اتالعان فاكتى بويىنشا ش ق و پوليتسيا دەپارتامەنتى سوتقا دەيىنگى تەرگەۋ شەڭبەرىندە تەرگەۋ امالدارىن جۇرگىزۋدە. سونىڭ ناتيجەسى بويىنشا قۇقىقتىق باعا بەرىلەدى.
