مارافونعا قاتىسقان سوڭ دەنەڭىزدە بولاتىن 7 وزگەرىس

استانا. قازاقپارات - الەم بويىنشا مارافون ماۋسىمى باستالدى. استانا مەن الماتىدا جاقىندا مارافون ءوتتى. پاريج بەن ۆەنا، لوندون مەن مانچەستەر سياقتى قالالاردا كوشەلەر جابىلىپ، مىڭداعان ادام 42,2 شاقىرىمدى باعىندىرۋعا شىعادى.

ءبىراق بۇل تەك فيزيكالىق سىناق قانا ەمەس. مارافون - اقىل-وي، دەنە جانە، كەيدە، جان ءۇشىن كۇرەس. سونىمەن، مارافون كەزىندە اعزاڭىزدا نە بولادى؟

1. ءسىز شىن مانىندە بويىڭىزدان ايىرىلۋىڭىز مۇمكىن

زەرتتەۋلەر مارافون كەزىندە ادامنىڭ بويى 1,5 سانتيمەترگە دەيىن قىسقاراتىنىن كورسەتكەن. بۇل الاڭدايتىن جاعداي ەمەس، ومىرتقاارالىق سۇيىقتىقتىڭ ازايۋى مەن بۇلشىقەت كەرنەۋىنە بايلانىستى ۋاقىتشا قۇبىلىس.

2. سۋدان باس تارتپاڭىز

مارافوننان كەيىن تارازىعا تارتىلساڭىز، 5 ك گ-عا دەيىن سالماق تاستاعانىڭىزدى بايقاۋىڭىز مۇمكىن. بۇل سۋدىڭ تەر ارقىلى سىرتقا شىعۋىنان بولادى. سول سەبەپتى جول بويىنداعى سۋ بەكەتتەرىن وتكىزىپ الماڭىز. سۋدىڭ جەتىسپەۋى جۇرەك اينۋ، السىزدىك پەن بۇلشىقەت قالپىنا كەلۋىنىڭ باياۋلاۋىنا سەبەپ بولادى.

3. كالوريانى كوپ جوعالتاسىز

ورتا ەسەپپەن ءبىر مارافون 3500 كالوريانى جاعۋعا سەبەپ بولادى. سوندىقتان جۇگىرۋشىلەر الدىن الا كومىرسۋعا باي تاعامدارمەن قورەكتەنەدى. جۇگىرۋ كەزىندە اعزا ماي مەن كومىرسۋدان قۋات الادى. جىلدام ەنەرگيا كوزى بولعاندىقتان، كومىرسۋ - باستى وتىن. ەنەرگيا گەلدەرى ءدال وسىنى تولىقتىرادى.

4. جۇگىرگەننەن كەيىن تابەتىڭىز قاشۋى مۇمكىن

25-شاقىرىمدا تەك تاماق تۋرالى ارمانداپ جۇگىرگەن بولارسىز. ءبىراق مارەدەن وتكەننەن كەيىن تاماق جەۋگە زاۋقىڭىز مۇلدە بولماۋى ابدەن مۇمكىن. ويتكەنى ينتەنسيۆتى جاتتىعۋلار كەزىندە قان اعىمى جۇرەك پەن اياققا باعىتتالادى، ال اس قورىتۋعا جاۋاپتى گورموندار، اسىرەسە اشتىق گورمونى گرەلين باسىلىپ قالادى.

5. ۇيقىڭىز بۇزىلۋى مۇمكىن

مارافوننان كەيىن نەگە كوز ىلە المايسىز؟ سەبەبى:
- فينيش سىزىعىنان وتكەن كەزدەگى ادرەنالين
- ەندورفيندەردىڭ كوبەيۋى
- جوعارى جۇرەك سوعىسى
- كورتيزول دەڭگەيىنىڭ ارتۋى - بۇل كۇيزەلىس گورمونى، ول دا اعزاعا تىنىشتىق بەرمەيدى.

6. تىرناقتىڭ ءتۇسىپ قالۋى؟ ءيا، بۇل دا مۇمكىن

بىرنەشە كۇن بويى باسپالداقپەن جۇرە الماۋ - ول انىق. ءبىراق دەنەڭىزدىڭ كەي جەرلەرى قاجالۋى، ءتىپتى تىرناقتىڭ ءتۇسىپ قالۋى - ءبارى مارافونشىلارعا تانىس قۇبىلىس.

7. «مارافوننان كەيىنگى كۇيزەلىس» بار

ءبارى ارتتا قالدى. ءبىراق نەگە ءىشىڭىز بوساپ قالعانداي؟ بۇل - انتيكليماكس. اپتالاپ دايىندالىپ، بەلگىلى ءبىر ماقساتپەن ءومىر ءسۇرىپ جۇرگەن ادام مارافون اياقتالعان سوڭ، «ەندى نە ىستەيمىن؟» دەگەن كۇيگە تۇسەدى. ەموتسيالىق كۇش ءتۇسۋ، فيزيكالىق شارشاۋ، ۇيقىنىڭ بۇزىلۋى - ءبارى كوڭىل-كۇيگە اسەر ەتەدى.

مارافون - بۇل جاي عانا 42,2 شاقىرىم جۇگىرىپ ءوتۋ ەمەس. بۇل - بۇكىل اعزانى سىناقتان وتكىزۋ. ءبىراق وسىنى بىلە تۇرا، مارافونعا قاتىسقان ءاربىر ادام جەڭىس سەزىمىن سەزىنۋگە لايىق.