مارافونعا قانداي شەكتەۋ قويىلۋى مۇمكىن - ۆيتسە-مينيستر جاۋابى

الماتى. قازاقپارات - 20-ءساۋىر كۇنى وتكەن الماتى جارتىلاي مارافونى كەزىندە ەكى ادام جارىس جولىندا جان تاپسىردى.

تۋريزم جانە سپورت ءمينيسترى ەربول مىرزابوسىنوۆ جارتىلاي مارافونداعى قايعىلى جاعدايدان سوڭ مينيسترلىك مۇنداي شارالارعا تالاپتى كۇشەيتەتىنىن الەۋمەتتىك جەلىدە جازعان ەدى.

«قازاقستانداعى سيفرلىق تۋريزم - 2025» فورۋمى بارىسىندا Kazinform ءتىلشىسى تۋريزم جانە سپورت ءمينيسترىنىڭ ورىنباسارى ەرجان ەركىنبايەۆتان ناقتى قانداي شارالار قابىلداناتىنىن سۇرادى.

- ءبىز بۇل ماسەلەنى تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-مينيسترىمەن تالقىلادىق. ولاردىڭ دا ۇسىنىستارى بار. مىسالى، پۋلسومەتر نە سپورت ساعاتتارىن تاعىپ، وزىنە ىڭعايلى پۋلس ايماعىندا جۇگىرۋ. ءبىراق مارافون - بۇل كاسىبي سپورت ەمەس، بۇقارالىق سپورت. سوندىقتان شەكتەۋ نە تالاپ قويۋ دۇرىس بولمايدى. نەگىزگى ستاتيستيكانى الساق، دۇنيەجۇزى بويىنشا 80 مىڭ مارافونشى اراسىندا 1 ادام قايتىس بولادى ەكەن. وكىنىشكە قاراي، بۇل ءومىر. ساعاتى بولسا دا، بولماسا دا قايتىس بولعان ەكى ازامات تا تاجىريبەلى مارافونشىلار. ءبىرىنشى جۇگىرۋلەرى ەمەس. شەكتەۋ قويعانمەن 100 پايىزدىق شەشىم جوق. ءبىراق بۇگىن مينيستر فەدەراتسيا جانە سپورت ماماندارىن بىرىكتىرىپ، ولاردىڭ ۇسىنىستارىن تالقىلايدى، - دەدى ۆيتسە- مينيستر.

ەسكە سالايىق، بۇعان دەيىن الماتىدا جارتىلاي مارافونعا قاتىسقان ەكى ادام قايتىس بولعانىن جازعانبىز.