مامىرداعى توسىن مىنەز: قازاقستاندا 24-26-مامىر ارالىعىندا ۇسىك جۇرەدى

استانا. KAZINFORM - «قازگيدرومەت» ر م ك 24-26-مامىر ارالىعىنا ارنالعان قازاقستان بويىنشا اۋا رايى بولجامىن جاريالادى.

- قازاقستاننىڭ سولتۇستىك وڭىرلەرىنە ىستىق جاز ءبىر كەلمەي-اق قويدى. ەل اۋماعىنىڭ باسىم بولىگىنە جاڭبىر مەن نايزاعاي اكەلگەن تسيكلوننان كەيىن ەندى سولتۇستىكتەن انتيتسيكلون جىلجىپ كەلە جاتىر. ول باتىس ايماقتاردا جاۋىن-شاشىننىڭ توقتاۋىنا جانە سولتۇستىكتە اۋا تەمپەراتۋراسىنىڭ ايتارلىقتاي تومەندەۋىنە سەبەپ بولادى، - دەپ ءتۇسىندىردى سينوپتيكتەر.

25-مامىردا باتىس قازاقستان وبلىسىندا، 25-مامىردا اقتوبە، قوستاناي، اقمولا، سولتۇستىك قازاقستان وبلىستارىندا، ال 26-مامىردا پاۆلودار وبلىسىندا تۇنگى ۋاقىتتا 1-3 گرادۋس ۇسىك جۇرەدى دەپ كۇتىلەدى.

ايتا كەتەيىك، كەشە اۋا رايىنا بايلانىستى ءبىرقاتار وڭىردە ەسكەرتۋ جاريالانعان بولاتىن.