ماۋلەن اشىمبايەۆ: قورعانىس كاسىپورىندارى مەملەكەتتىڭ مەنشىگىندە بولۋى كەرەك

سەنات ءتوراعاسى ماۋلەن اشىمبايەۆ مەملەكەتتىك قورعانىس كاسىپورىندارىن جەكەشەلەندىرۋ جونىندە پىكىر ءبىلدىردى، دەپ حابارلايدى Kazinform.

سەنات دەپۋتاتتارى ۇلتتىق زاڭناماعا قاۋىپسىزدىكتى قامتاماسىز ەتۋ جانە ارناۋلى مەملەكەتتىك ورگاندارىنداعى قىزمەت ماسەلەلەرى تۋرالى وزگەرىس ەنگىزۋدى كوزدەيتىن زاڭ جوباسىن ەكى وقىلىمدا تالقىلاپ جاتىر.

اتالمىش زاڭ جوباسىندا قورعانىس- ونەركاسىپ كەشەنىندەگى ستراتەگيالىق وبەكتىلەر تىزبەسىن قالىپتاستىرۋ، مەملەكەت مەنشىگىندەگى كاسىپورىنداردى «التىن اكسيا» ۇلەسى ساقتالعان جاعدايدا جەكەشەلەندىرۋگە رۇقسات ەتۋ نورمالارى ۇسىنىلعان.

پالاتا ءتوراعاسى ماۋلەن اشىمبايەۆ اتالمىش زاڭداعى قۇجاتتىڭ وسى بولىگىنە بايلانىستى پىكىر ءبىلدىردى.

«جالپى مەملەكەتتىك قورعانىس كاسىپورىندارىنىڭ جاعدايىنا بايلانىستى ءبىراز سۇراقتار بار. بىز ەندى „»قازينجينيرينگ« دەگەن كومپانيا جۇمىس ىستەپ جاتىر. ونى ءبارىمىز بىلەمىز. ونشاقتى زاۋىتى بار. ءبىراق سولاردىڭ مەملەكەتتىك ورگانداردىڭ تاراپىنان تاپسىرىس الۋ ماسەلەسىندە كوپتەگەن تۇيتكىلدەر، ماسەلەلەر بار ەكەنى جاسىرىن ەمەس. بۇلار مەملەكەتتىڭ قورعانىس الەۋەتىنە ۇلەس قوسىپ جۇرگەن كاسىپورىندار. بىزگە ولاردى قولداۋدىڭ ءبىر قالىبىن، فورماتتارىن تابۋ كەرەك. ەگەر مەملەكەتكە ونداي كاسىپورىندار كەرەك بولماسا، „بىزگە ول كەرەك جوق، شەتەلدەن ساتىپ الامىز«،-دەپ اشىق ايتۋ كەرەك. وعان جەتكىزۋگە بولمايدى عوي. بىزدە وزىمىزدە قورعانىس كاسىپورىندارى بولۋ كەرەك. بۇل - ۇلتتىق قاۋىپسىزدىك ماسەلەسى. ءبىز ولار مەملەكەتتىڭ مەنشىگىندە بولۋ كەرەك دەپ قابىلدايمىز. سول سەبەپتى وسىنداي كاسىپورىنداردى قولداۋدىڭ ءبىر جۇيەلى تەتىكتەرى كەرەك ەكەنى انىق. سىزدەرگە وسى ماسەلەنى ءبىزدىڭ حالىقارالىق ىستەر، قورعانىس جانە قاۋىپسىزدىك كوميتەتىمەن پىسىقتاپ، زاڭ اياسىندا قانداي مۇمكىندىكتەر بار ەكەنىن انىقتاۋ كەرەك دەپ ەسەپتەيمىز. زاڭعا مەملەكەتتىك كاسىپورىنداردى قولداۋ باعىتىندا وزگەرىس ەنگىزۋ كەرەك بولسا، ول جاعىن دەپۋتاتتارمەن قاراستىرۋعا دايىنبىز. ءبىراق سىزدەردەن ناقتى پوزيتسيا، ۇستانىم كەرەك. ەگەر ءبىزدىڭ ۇستانىمىمىز بولماسا، ول كاسىپورىندار وزىمەن- ءوزى جۇرەتىن بولسا، مەملەكەتتىك تاپسىرىس وزىمەن- ءوزى قالىپتاسىپ جاتاتىن بولسا، جۇيەلى جۇمىس بولمايتىنى انىق. سول سەبەپتى وسى باعىتتاعى جۇمىستى جاڭا دەڭگەيگە شىعاراسىزدار دەپ سەنەمىز. ءبىز بىرگە جۇمىس ىستەۋگە دايىنبىز»، - دەدى ماۋلەن اشىمبايەۆ.
اۆتور
ەسىمجان ناقتىباي