ماۋلەن اشىمبايەۆ: قازاقستاندا سال اۋرۋىنا شالدىققان 18 مىڭ بالا بار

ق ر پارلامەنت سەناتىنىڭ ءتوراعاسى ماۋلەن اشىمبايەۆ حالىقارالىق تسەرەبرالدى سال اۋرۋىمەن كۇرەس كۇنىنىڭ ماڭىزىنا توقتالىپ، مەملەكەت اتقارىپ جاتقان ءىس-شارالاردى اتاپ ءوتتى، دەپ حابارلايدى قازاقپارات.

Мәулен Әшімбаев
Фото: Фото: из открытых источников

«بۇگىن الەم حالىقارالىق تسەرەبرالدى سال اۋرۋىمەن كۇرەس كۇنىن اتاپ وتەدى. بۇل كۇن بتسس (د ت س پ) دياگنوزى بار ادامدار كەزدەسەتىن قيىندىقتارعا، ولاردى شەشۋ ءۇشىن ناقتى شارالار قابىلداۋ كەرەگىنە نازار اۋدارۋ ءۇشىن بەكىتىلگەن»، - جازدى ول الەۋمەتتىك جەلىدەگى پاراقشاسىنا.

ستاتيستيكا بويىنشا الەمدە بۇل دەرتكە شالدىققان 17 ميلليوننان استام ادام بار. قازاقستاندا ولاردىڭ سانى 26 مىڭنان اسادى، ونىڭ 18 مىڭى - بالا.

سەنات ءتوراعاسى پرەزيدەنت قاسىم-جومارت توقايەۆتىڭ باستاماسىمەن ءادىل جانە ينكليۋزيۆ قوعام قۇرۋ تۋرالى كۋرسى اشىلعانىن، مەملەكەت كەدەرگىسىز ورتا قۇرۋ ماسەلەسىنە باسا نازار اۋداراتىنىن، ادامدار سىرقات تۇرىنە قاراماستان تەڭ دارەجەدە الەۋمەتتەنۋ جانە ءوزىن دامىتۋعا مۇمكىندىك الۋ كەرەك ەكەنىن ايتتى.

«جاقىندا سەنات جانىنان ينكليۋزيا بويىنشا كەڭەس قۇرىلدى. جاڭا الاڭ ءتۇرلى دياگنوزى بار جانە مۇمكىندىگى شەكتەۋلى ادامدارعا جاعداي جاساۋعا كومەكتەسەدى»، دەيدى اشىمبايەۆ مىرزا.

سونداي-اق ول الەۋمەتتەنۋدىڭ ماڭىزدى بولىكتەرىنىڭ ءبىرى سپورت ەكەنىنە توقتالدى: ەلىمىزدە قارقىندى دامىپ كەلە جاتقان، سپورتتىڭ پاراليمپيادا تۇرىنە ەنگەن باعىتتاردىڭ ءبىرى - بوچچا. بيىل بوچچادان ءبىزدىڭ قۇراما ازيا پاراليمپيادا ويىندارىنا قاتىسادى. بۇل - قولداۋ مەن جاعداي جاسالسا، ەرەكشە قاجەتتىلىگى بار ادامدار ءۇشىن الىنبايتىن قامال جوق ەكەنىن دالەلدەيدى.

ءسوز سوڭىندا ول ب ت س س دياگنوزى بار ادامداردى قولداۋعا ارنالعان جوبالارعا قاتىسۋعا شاقىردى.

سوڭعى جاڭالىقتار