ماۋلەن اشىمبايەۆ ۋكرايناداعى جاعداي تۋرالى پىكىر ءبىلدىردى

استانا. KAZINFORM - سەنات ءتوراعاسى ماۋلەن اشىمبايەۆ استانادا ءوتىپ جاتقان الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ 22- وتىرىسىندا ۋكراينا مەن تاياۋ شىعىستىڭ ماسەلەسىنە توقتالدى.

«كەيىنگى بىرنەشە جىلدا ادامزات بۇرىن-سوڭدى بولماعان قيىندىقتارعا تاپ كەلدى. بۇگىنگى تاڭدا الەم جاھاندىق سىن-قاتەرلەر مەن قاۋىپتەردىڭ ءبارى ءوزارا شيەلەنىسكەن احۋالىندا تۇر. تاياۋ شىعىستا وتە قيىن جاعداي قالىپتاستى. ءبارىمىز وسى ايماقتاعى شيەلەنىستىڭ كۇشەيگەنىنە قاتتى الاڭدايمىز»، - دەدى سپيكەر.

سەنات ءتوراعاسى قازاقستان وسى شيەلەنىسكە قاتىسى بار تاراپتاردىڭ ءبارىن كۇش قولدانۋدان باس تارتۋعا شاقىراتىنىن اتاپ ءوتتى.

«وسىعان بايلانىستى تاياۋ شىعىستاعى كەلىسپەۋشىلىكتەردى ب ۇ ۇ جارعىسى مەن حالىقارالىق قۇقىق قاعيداتتارى شەڭبەرىندە تەك ساياسي- ديپلوماتيالىق جولمەن شەشۋ ءۇشىن جەدەل شارالار قابىلداۋدىڭ ماڭىزدىلىعىن اتاپ وتەمىز. سونىمەن قاتار، ۋكراينادا قانتوگىستى قاقتىعىس جالعاسىپ جاتىر. جالپى، جەر شارىندا «ىستىق نۇكتەلەر» كوبەيىپ كەلەدى. قاقتىعىستاردىڭ كۇشەيۋى سوڭعى ونجىلدىقتارداعى حالىقارالىق قاۋىمداستىقتىڭ جەتىستىكتەرىنە نۇقسان كەلتىرىپ وتىر، قارۋلانۋ جارىسىنا جانە ەڭ باستىسى، بەيبىت تۇرعىنداردىڭ قايعى-قاسىرەتى مەن شىعىنىنا اكەلىپ جاتىر»، - دەدى ماۋلەن اشىمبايەۆ.

سەنات ءتوراعاسى ءار ءتۇرلى كۇشتەردىڭ راديكالدى يدەولوگيانى ىلگەرىلەتىپ، كسەنوفوبيانى قوزدىرۋعا حالىقارالىق شيەلەنىستەردى پايدالانىپ جاتقانىن ايتتى.

«الەمدە تەرروريستىك جانە ەكسترەميستىك توپتار قايتا جانداندى. بۇل جاعىمسىز تەندەنسيالار كەدەيلىك پەن تەڭسىزدىك، قورشاعان ورتانىڭ ناشارلاۋى جانە كليماتتىق داعدارىس سياقتى قيىندىقتاردى كۇشەيتەدى»، - دەدى ول.

اۆتور
ەسىمجان ناقتىباي