مالدى سايكەستەندىرۋ جۇيەسى ەۋروپالىق تالاپقا كوشپەك - ا ش م
استانا. KAZINFORM - ەلىمىزدە ەۋرووداق تالاپتارىنا سايكەس كەلەتىن ءۇي جانۋارلارىن سايكەستەندىرۋدىڭ ءبىرىڭعاي ورتالىقتاندىرىلعان جۇيەگە كوشۋدى جوسپارلاپ وتىر. بۇل تۋرالى اۋىل شارۋاشىلىعى ۆيتسە- ءمينيسترى ەرمەك كەنجەحان ۇلى ءمالىم ەتتى.
- مينيسترلىك ۆەتەريناريالىق جۇيە مەن بيولوگيالىق قاۋىپسىزدىكتى دامىتۋعا ەرەكشە نازار اۋدارادى. بىرىككەن ۇلتتار ۇيىمىنىڭ ازىق-تۇلىك جانە اۋىل شارۋاشىلىعى ۇيىمى ءبىزدىڭ سۇراۋىمىزبەن اۋىل شارۋاشىلىعى جانۋارلارىن سايكەستەندىرۋدىڭ ۇلتتىق جۇيەسىنە باعا بەرۋدە تەحنيكالىق قولداۋ كورسەتتى، ول ءۇشىن العىس ايتامىز. سونىمەن قاتار حالىقارالىق ۇيىم ەسكىرگەن پلاتفورمانى جاڭعىرتۋ بويىنشا «ءبىرىڭعاي ورتالىقتاندىرىلعان جۇيە» فورماتىنا كوشىرۋ بويىنشا قۇندى ۇسىنىستار بەردى، بۇل ونىڭ ەۋرووداق تالاپتارىنا سايكەستىگىن قامتاماسىز ەتەدى. الايدا، ۇسىنىستاردى جۇزەگە اسىرۋ ءۇشىن قوسىمشا تەحنيكالىق قولداۋ قاجەت، وسىعان بايلانىستى ب ۇ ۇ- نىڭ ازىق-تۇلىك جانە اۋىل شارۋاشىلىعى ۇيىمى ارقىلى گرانتتار تارتۋ نەمەسە دونورلاردى ىزدەستىرۋ جاعىن قاراستىرساق، - دەدى ەرمەك كەنجەحان ۇلى ەلوردادا ءوتىپ جاتقان اۋىل شارۋاشىلىعى سالاسىن دامىتۋعا ارنالعان دوڭگەلەك ۇستەل بارىسىندا.
مينيستر ورىنباسارىنىڭ ايتۋىنشا، وتاندىق ۆەتەريناريالىق پرەپاراتتار سالاسىنا دا تسيفرلىق باقىلاۋ جۇيەسىن ەنگىزۋ قاجەت.
- وسى ورايدا ب ۇ ۇ- نىڭ ازىق-تۇلىك جانە اۋىل شارۋاشىلىعى ۇيىمى بيۋروسىمەن بىرلەسىپ، دۇنيەجۇزىلىك ساۋدا ۇيىمىنىڭ ساۋدا ستاندارتتارى مەن دامۋ قورى (STDF) اياسىندا گرانتتىق قارجىلاندىرۋ الۋ ءۇشىن ءوتىنىم ازىرلەنىپ، جىبەرىلدى. ءبىز بۇل باستامامىزدىڭ قولداۋ تاباتىنىنا ءۇمىتتىمىز. قازاقستان ب ۇ ۇ- نىڭ ازىق-تۇلىك جانە اۋىل شارۋاشىلىعى ۇيىمىمەن ۆەتەريناريالىق باقىلاۋ سالاسىنا حالىقارالىق ستاندارتتاردى ەنگىزۋ، مامانداردىڭ بىلىكتىلىگىن ارتتىرۋ، سونداي-اق مال شارۋاشىلىعىندا اۋرۋلاردىڭ تارالۋىن بولدىرماۋ جانە باقىلاۋ بويىنشا بىرلەسكەن شارالاردى ازىرلەۋ باعىتىندا جۇمىستى جالعاستىرۋعا دايىن. قازىردىڭ وزىندە ب ۇ ۇ- نىڭ ازىق-تۇلىك جانە اۋىل شارۋاشىلىعى ۇيىمىنىڭ تەحنيكالىق قولداۋىمەن ەلىمىزدە «ءبىر دەنساۋلىق» تۇجىرىمداماسى اياسىندا ۆەتەريناريا سالاسىندا ءۇش جوبا جۇزەگە اسىرىلىپ جاتىر، - دەپ تولىقتىردى سپيكەر.
بۇعان دەيىن حابارلاعانىمىزداي ەلىمىزدە اۋىل شارۋاشىلىعى ونىمدەرىن قايتا وڭدەۋدى دامىتۋدىڭ كەشەندى جوسپارى قابىلداندى.
ايتا كەتەيىك، بىلتىر اۋىل شارۋاشىلىعى ونىمدەرى كولەمى %13,7- عا ارتىپ، سالا ءۇشىن رەكوردتىق ماۋسىم بولدى.
اۆتور
داۋلەت ىزتىلەۋ
