مالدىڭ ءبارى وزبەكستانعا تىرىدەي اسىرىلىپ جاتىر - ا ش م تۇسىنىك بەردى
استانا. KAZINFORM - ەلىمىزدەن سىرتقا مال ساتۋعا ارنايى كۆوتا بەلگىلەنگەن. سونىڭ اياسىندا ءار 6 ايدا ەلدەن شىعارىلاتىن مالدىڭ ناقتى سانى انىقتالادى. بۇل تۋرالى Kazinform اگەنتتىگى جولداعان ساۋالعا اۋىل شارۋاشىلىعى مينيسترلىگىنىڭ رەسمي جاۋابىندا ايتىلعان.
- 2024 -جىلعى 26-قازاننان 2025 -جىلعى 26-ساۋىرگە دەيىن «ق ر اۋماعىنان اۋىل شارۋاشىلىعى جانۋارلارىن اكەتۋدىڭ كەيبىر ماسەلەلەرىنە» ق ر اۋىل شارۋاشىلىعى ءمينيسترىنىڭ بۇيرىعىمەن ءىرى قارا مال جانە ۇساق مال اكەتۋگە ساندىق شەكتەۋلەر (كۆوتالار) بەلگىلەندى: 12 ايدان اسقان بۇقاشىقتاردىڭ ەكسپورتىنا - 85000 جانە 6 ايدان اسقان ەركەك توقتى سانى - 120000. اتالعان كۆوتا تەتىگى 2022 -جىلدان باستاپ ىسكە اسىرىلىپ كەلەدى جانە 6 اي سايىن حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسياسىنىڭ شەشىمىمەن ۇزارتىلىپ وتىرادى، - دەلىنگەن حابارلامادا.
مينيسترلىكتىڭ مالىمدەۋىنشە، وسىلايشا فەرمەرلەردىڭ تىرىدەي مال ەكسپورتتاۋ مۇمكىندىگى ارتىپ وتىر.
- بۇل تەتىك - ىشكى نارىقتىڭ قاجەتتىلىكتەرىن قاناعاتتاندىرۋمەن قاتار، فەرمەرلەردىڭ ەكسپورتقا شىعۋ الەۋەتىن ساقتاۋعا مۇمكىندىك بەرەتىن تەڭگەرىمدى شارا. 2024 -جىلدىڭ قورىتىندىسى بۇل تاسىلدەردىڭ تيىمدىلىگىن كورسەتتى، ياعني سيىر ەتىنىڭ ەكسپورتى 1,5 ەسەگە ءوسىپ، 22,1 مىڭ توننا بولدى، سونىڭ ىشىندە وزبەكستانعا ەكسپورت 20,7 مىڭ تونناعا جەتتى، - دەلىنگەن جاۋاپتا.
سونىمەن قاتار، قازىرگى تاڭدا وزبەكستانعا زاڭسىز مال اسىرۋ ماسەلەسى دە كۇن تارتىبىندە تۇر. بۇعان دەيىن Kazinform تىلشىسىنە ۇلتتىق قاۋىپسىزدىك كوميتەتى شەكارا قىزمەتى ديرەكتورىنىڭ ورىنباسارى تولەۋجان ءجۇنىسوۆ وزبەكستانعا زاڭسىز وتكىزىلگەن مال ءارى قاراي تاجىكستان، اۋعانستان، پاكىستانعا كەتەتىنىن ايتىپ بەرگەن بولاتىن. سەبەبى ول ەلدەردە باعا ايىرماشىلىعى ەكى ەسەگە دەيىن بارادى.
