مالايزيا ءومىر ءسۇرۋ قۇنىنىڭ وسۋىنە بايلانىستى حالىققا اقشا تاراتادى
استانا. KAZINFORM - مالايزيا پرەمەر-ءمينيسترى انۋار يبراگيم ءومىر ءسۇرۋ قۇنىنىڭ وسۋىنە بايلانىستى حالىقتى قولداۋدىڭ جاڭا شارالارىن جاريالادى، دەپ حابارلايدى Bangkokpost.
ەلدىڭ كامەلەتكە تولعان ازاماتتارى 100 رينگگيت (23,70 دوللار) كولەمىندە ءبىر رەتتىك تولەم الادى.
كومەك باعدارلاماسىنىڭ جالپى قارجىلاندىرىلۋى 2025 -جىلى 15 ميلليارد رينگگيتتى قۇرايدى، بۇل باستاپقىدا جوسپارلانعان 13 ميلليارد رينگگيتتەن اسادى.
بۇل شارالار كۋالا-لۋمپۋردا سەنبىگە جوسپارلانعان جاپپاي نارازىلىقتار الدىندا جاريالاندى. وپپوزيتسيا ۇكىمەتتى باعانىڭ ءوسۋىن توقتاتا الماي، ۋادە ەتىلگەن رەفورمالاردى جۇزەگە اسىرمادى دەپ ايىپتايدى. دەمونستراتسياعا 10-15 مىڭعا جۋىق ادام قاتىسادى دەپ كۇتىلۋدە.
پرەمەر-مينيستر حالىق شىعىنىن ودان ءارى ازايتۋ قاجەتتىگىن اتاپ ءوتىپ، كەدەيشىلىكپەن كۇرەسۋ ءۇشىن قوسىمشا شارالار قابىلداۋعا ۋادە بەردى. ۇكىمەت سونىمەن قاتار RON95 جانارمايىنا جاڭا سۋبسيديالاۋ جۇيەسىن ەنگىزەدى، بۇل بەنزين باعاسىن ليترىنە شامامەن 1,99 رينگيتكە دەيىن تومەندەتەدى.
ساراپشىلاردىڭ پىكىرىنشە، مۇنداي قادامدار ىشكى سۇرانىستى قولداۋ ءۇشىن قاجەت، ءبىراق بۇل ەل بيۋدجەتىنە قوسىمشا قىسىم جاسايدى. ەكونوميستەر جانار-جاعارمايعا سۋبسيديالاۋ رەفورماسىنىڭ كەشىگۋى ۇكىمەتتىڭ 2028 -جىلعا قاراي بيۋدجەت تاپشىلىعىن ج ءى ءو-نىڭ 3 پايىزىنا دەيىن تومەندەتۋ ماقساتىن ورىنداۋعا كەدەرگى كەلتىرۋى مۇمكىن دەپ ەسكەرتتى.
