مال شارۋاشىلىعىن دامىتۋعا نەسيە الاتىندار كوپ

استانا. KAZINFORM - بىلتىر مەملەكەت باسشىسىنىڭ تاپسىرماسىنا سايكەس ەلىمىزدە «اۋىل اماناتى» باعدارلاماسى جۇزەگە اسا باستاعانى بەلگىلى.

شاعىن نەسيەلەۋ باعدارلاماسىنا ءوتىنىش بىلدىرگەندەردىڭ ۇلەسىن ساراپتاساق، اۋىل تۇرعىندارى كوبىنە مال شارۋاشىلىعىن دامىتۋعا قىزىعۋشىلىق تانىتىپ وتىر.

بۇل تۋرالى ورتالىق كوممۋنيكاتسيالار قىزمەتىندە وتكەن دوڭگەلەك ۇستەل بارىسىندا ق ر اۋىل شارۋاشىلىعى ۆيتسە-ءمينيسترى ەربول تاسجۇرەكوۆ ايتتى.

- مال شارۋاشىلىعى سالاسىنا بەرىلگەن ميكروكرەديتتەر جالپى نەسيەنىڭ 79 پايىزىن قۇرايدى. نەسيەنىڭ 4,1 پايىزى وسىمدىك شارۋاشىلىعىنا، 16,9 پايىزى اۋىل شارۋاشىلىعىنا جاتپايتىن بيزنەس تۇرلەرىنە باعىتتالدى. قاراجاتتىڭ نەگىزگى بولىگى جامبىل، تۇركىستان، اقتوبە جانە الماتى وبلىستارىنا ۇلەستىرىلدى،- دەدى ەربول تاسجۇرەكوۆ.

ونىڭ سەبەبى دە بار. اتالعان وبلىستاردا تابىسى ەڭ تومەنگى كۇنكورىس دەڭگەيىنەن تومەن وتباسىلاردىڭ ەڭ كوپ سانى، سونداي-اق قۇرامىندا ەڭبەككە قابىلەتتى ادامدار قاتارىندا جۇمىسپەن قامتىلماعان وتباسىلار بايقالادى.

ۆيتسە-ءمينيستردىڭ ايتۋىنشا، باعدارلاما ەرەجەسىنە سايكەس، جىلدىق %2,5 سىياقى مولشەرلەمەسى بويىنشا 5 جىلعا دەيىنگى مەرزىمگە ميكروكرەديت بەرۋ كوزدەلگەن. مال شارۋاشىلىعى سالاسىنداعى جوبالار ءۇشىن ميكروكرەديت 7 جىلعا دەيىن بەرىلەدى. ميكروكرەديتتىڭ ەڭ جوعارى سوماسى 2,5 مىڭ ا ە ك-كە تەڭ.