مال دارىگەرلەرىنىڭ جالاقىسى كوتەرىلە مە

استانا. KAZINFORM - بۇگىن - ۆەتەريناريا قىزمەتكەرلەرىنىڭ كۇنى. قازاقستاندىق ۆەتەرينارلار كاسىبي مەرەكەسىن قالاي اتاپ وتۋدە؟ Jibek Joly ارناسىنىڭ «بۇگىن LIVE» ستۋدياسىنا قوناق بولعان سالا ماماندارى جاۋاپ بەردى.

- بىزدە مەرەكە قارساڭىندا ءبىراز شارالار ۇيىمداستىرىلىپ جاتىر. بۇگىن ۆەتەرينار ماماندارىنا بەرىلەتىن سىي شارالارى دا وتكىزىلىپ جاتىر، - دەيدى ق ر اۋىل شارۋاشىلىعى مينيسترلىگىنە قاراستى ۆەتەريناريا سالاسىنداعى حالىقارالىق ىنتىماقتاستىق باسقارماسىنىڭ باسشىسى قىزعالداق جۇباتقانوۆا.

ال بيولوگيالىق قاۋىپسىزدىك باسقارماسىنىڭ باس ساراپشىسى جاقىندا ۆەتەرينارلاردىڭ جالاقىسى كوتەرىلەتىنىن جەتكىزدى.

- قازىر ءدال وسى سالادا مامان تاپشىلىعى اۋىل-ايماقتاردا سەزىلىپ جاتىر. دەسە دە كەشە ۇكىمەت وتىرىسىندا ۇكىمەت باسشىسى اكىمدىكتەرگە جالاقىنى كوتەرۋ بويىنشا ارنايى تاپسىرمالار بەردى. جالاقى كوتەرىلگەننەن كەيىن بىلىكتى ماماندار دا تارتىلادى دەپ سەنەمىز، - دەيدى ازامات ءومىرقۇل.

ماماندار بۇل سالا تەك جانۋارلاردى ەمدەۋمەن شەكتەلمەيتىنىن ايتادى.

- ۆەتەريناريا سالاسى تەك قانا جانۋارلاردىڭ اۋرۋىن ەمدەۋمەن شەكتەلمەيدى. ودان بولەك، ءبىز وزگە مەملەكەتتەرمەن دە بىرلەسىپ جۇمىستار اتقارامىز. جانۋاردان الاتىن ونىمدەردى ەكسپورتتاۋعا ارنالعان ۆەتەريناريالىق قۇجاتتارعا كەلىسىمشارتتار جۇرگىزەمىز. سونىمەن قاتار بىزدە شەكارادا باقىلاۋ- قاداعالاۋ، ەپيزووتيالىق احۋالدى باقىلاۋ مىندەتتەرى بار. تەمىرجول، اۋەجاي بەكەتتەرىندە ءبىزدىڭ ۆەتەرينار ينسپەكتورلار تۇرادى. ءبىز سىرتقى ەلدەن يمپورتتالاتىن تاۋارلاردى قاداعالايمىز. ول ونىمدەردى يمپورتتاۋ الدىندا ءبىز سول ەلگە تەكسەرۋگە بارامىز. بۇل سالا كۇردەلى بولعاندىقتان ءبىز جان-جاقتى جۇمىس ىستەيمىز، - دەيدى قىزعالداق جۇباتقانوۆا.

ستۋديا قوناقتارىنىڭ سوزىنشە، ۆەتەريناريا سالاسىنا قىزىعۋشىلاردىڭ سانى جىل ساناپ ارتىپ كەلەدى.

- قازىر جاستاردىڭ وسى سالاعا دەگەن قىزىعۋشىلىعى ارتىپ كەلە جاتىر. ويتكەنى قازىرگى تاڭدا مەملەكەت باسشىسىنىڭ تاپسىرماسىمەن ۆەتەريناريا سالاسىنا ۇلكەن كوڭىل بولىنۋدە. جەرگىلىكتى جەرلەردە ماتەريالدىق- تەحنيكالىق بازالارى جاڭارتىلىپ، جالاقىسى كوتەرىلۋدە. جانە ءار وڭىردە مامانداردى ىنتالاندىرۋ ماقساتىندا وقۋ-جاتتىعۋ جيىندارى دا جۇرگىزىلەدى، - دەيدى بيولوگيالىق قاۋىپسىزدىك باسقارماسىنىڭ باس ساراپشىسى.

ۆەتەريناريا سالاسىنداعى حالىقارالىق ىنتىماقتاستىق باسقارماسىنىڭ باسشىسى جاس مامانداردى عىلىمي باعىتتا دا جۇمىس ىستەۋگە شاقىردى.

- جاستارعا تەك مال اۋرۋىمەن شەكتەلمەي، باسقا دا قىزىقتى جۇمىستارعا نازار اۋدارۋىن ايتقىم كەلەدى. بىزدە ءتۇرلى قىزىقتى باعىتتار كوپ. ۆەتەريناريا سالاسى عىلىمي تۇردە دە جۇمىس اتقارادى. ماسەلەن، كوروناۆيرۋس كەزىندە نەگىزگى ۆاكسينالاردى زەرتتەپ تاۋىپ، شىعارعان - وسى ۆەتەريناريا سالاسىنداعى ماماندار. وندا قىزمەتكەرلەر ءارتۇرلى اۋرۋلارمەن جۇمىس اتقارادى. سول سەبەپتى، ءبىز مامانداردى وسى سالاعا شاقىرامىز، - دەيدى ول.

ەسكە سالا كەتەيىك، ەندى ۆەتەريناريالىق قۇجاتى جوق مال ءونىمىن ساتقاندار قىلمىستىق جاۋاپكەرشىلىككە تارتىلۋى مۇمكىن.

ودان بولەك، جاقىندا اۋىل شارۋاشىلىق مينيسترلىگى اباي وبلىسىنداعى 10 اۋداننىڭ جەتەۋىندە ۆەتەريناريالىق ستانسا جوق ەكەنىن حابارلادى.