ماكرون يزرايلدىڭ يرانعا جاساعان شابۋىلدارىن دەرەۋ توقتاتۋعا شاقىردى

استانا. KAZINFORM - فرانسيا پرەزيدەنتى ەممانۋەل ماكرون يراننىڭ يادرولىق جانە بالليستيكالىق باعدارلامالارىنا قاتىسى جوق يزرايل شابۋىلدارىن دەرەۋ توقتاتۋعا شاقىردى، دەپ حابارلايدى انادولى.

ەليسەي سارايى جاريالاعان جازباشا مالىمدەمەدە، ماكرون 18 - ماۋسىمدا يزرايلدىڭ يرانعا جاساعان شابۋىلدارىن تالقىلاۋ ءۇشىن ۇلتتىق قورعانىس جانە قاۋىپسىزدىك كەڭەسىن شاقىرعانى ايتىلعان.

- پرەزيدەنت يراننىڭ يادرولىق جانە بالليستيكالىق باعدارلامالارىنا قاتىسى جوق نىساندارىنا قارسى يزرايل شابۋىلدارىنىڭ ۇدەۋى مەن يران مەن يزرايلدە بەيبىت تۇرعىندار اراسىنداعى قۇرباندار سانىنىڭ ارتۋىنا الاڭداۋشىلىق ءبىلدىردى. بۇل اسكەري ارەكەتتەر وڭىرلىك قاۋىپسىزدىككە ۇلكەن قاتەر توندىرەدى جانە دەرەۋ توقتاتىلۋى ءتيىس، - دەلىنگەن مالىمدەمەدە.

ماكرون يراننىڭ يادرولىق جانە بالليستيكالىق باعدارلامالارى ماسەلەسىن شەشۋدىڭ جالعىز جولى كەلىسسوزدەر ەكەنىن اتاپ ءوتتى. سونداي-اق فرانسيا پرەزيدەنتى يراننىڭ ايماقتاعى ءىس-ارەكەتتەرى بويىنشا ديالوگ باستاۋعا دايىن ەكەنىن ءبىلدىردى.

مالىمدەمەدە ماكرون فرانسيانىڭ سىرتقى ىستەر ءمينيسترى جان-نوەل بارروعا الداعى كۇندەرى ەۋروپالىق سەرىكتەستەرمەن بىرلەسە وتىرىپ، يزرايلدىڭ يرانعا جاساعان شابۋىلدارىن توقتاتۋعا باعىتتالعان كەلىسسوزدەر باستاماسىن قولعا الۋدى تاپسىرعانى جازىلعان.

سونىمەن قاتار ماكرون بارروعا وسى ەكى ەلدەن كەتكىسى كەلەتىن فرانسۋز ازاماتتارى ءۇشىن قاجەتتى شارالاردى قابىلداۋدى تاپسىردى جانە فرانسۋز ازاماتتارىنا اتالعان ەلدەرگە بارۋدان باس تارتۋعا قاتاڭ كەڭەس بەرىلدى.

اۆتور

نازىم بولەسوۆا