ماكرون قازاقستانعا ساپارى جايلى جەلىگە جازدى: جاستار - ءبىزدىڭ دوستىعىمىزدىڭ ايناسى

 فرانسيا پرەزيدەنتى ەممانيۋەل ماكرون قازاقستانعا ساپارىنان كەيىنگى اسەرىن X الەۋمەتتىك جەلىسىندە ءبولىستى، دەپ حابارلايدى Kazinform. 

- قازاقستان مەن فرانسيا اراسىندا بۇگىن كوپتەگەن كەلىسىمدەر جاسالدى. بۇل - ءبىزدىڭ ماڭىزدى سىن-قاتەرگە قارسى ىنتىماقتاستىعىمىز. مىنە، ءبىزدىڭ جاستار! ولار - مادەنيەتىمىز بەن ءتىلىمىزدى بايلانىستىرۋشى. مەن استانادا كەزدەستىرگەن جاستار - ءبىزدىڭ دوستىعىمىزدىڭ ايناسى، - دەپ جازدى ە. ماكرون.

بۇعان دەيىن فرانسيا پرەزيدەنتىنىڭ 1-قاراشادا قازاقستانعا رەسمي ساپارمەن كەلگەنى حابارلانعان بولاتىن.

وندا مەملەكەت باسشىسى قاسىم-جومارت توقايەۆ اقوردادا ەممانيۋەل ماكرونمەن كەزدەستى، كەزدەسۋ راسىمىنەن كەيىن ەكى ەل باسشىلارى شاعىن قۇرامدا كەلىسسوز جۇرگىزدى.

ارىپتەستىك كەزدەسۋ بارىسىندا قازاقستان پرەزيدەنتى فرانسيانىڭ ەۋروپالىق وداقتاعى ءبىزدىڭ نەگىزگى جانە سەنىمدى سەرىكتەسىمىز، سونداي-اق ەكونوميكامىزعا ءىرى ينۆەستورلاردىڭ ءبىرى ەكەنىن اتاپ ءوتتى.

بۇعان دەيىن فرانسيا قازاقستانعا 18,7 ميلليارد دوللارعا جۋىق ينۆەستيتسيا سالعان.

بىرلەسكەن جوبالار ەنەرگەتيكا، بەيبىت اتوم ەنەرگەتيكاسى، تاۋ-كەن جانە حيميا ونەركاسىبى، ماشينا جاساۋ، قۇرىلىس ماتەريالدارى ءوندىرىسى، اەروعارىش، فارماتسيەۆتيكا جانە باسقا دا سالالارعا قاتىستى.

ءوز كەزەگىندە ەممانيۋەل ماكرون قازاقستان مەن فرانسيا اراسىنداعى قارىم-قاتىناستى جوعارى باعالادى. كەيىن فرانسيا پرەزيدەنتى كەڭەيتىلگەن جيىندا ءسوز سويلەدى.

كەڭەيتىلگەن وتىرىستا قازاقستان باسشىسى قول قويىلعان ءبىرقاتار كەلىسىمدەردى اتاپ ءوتتى.

- ءبىز مادەني-گۋمانيتارلىق سالاداعى ىنتىماقتاستىقتىڭ ماڭىزىن ەسكەرە وتىرىپ، ءبىلىم جانە عىلىم سالاسىنداعى جوبالاردى جۇزەگە اسىرۋعا ەرەكشە نازار اۋداردىق. وسىعان وراي ەلىمىزدە فرانسۋز مەكتەپتەرىن اشۋ، فرانسۋز ءتىلىن وقىتۋ، اكادەميالىق بايلانىستى دامىتۋعا باعىتتالعان ءبىرقاتار كەلىسىمدەرگە قول قويىلدى، - دەدى قاسىم-جومارت توقايەۆ.

سونداي-اق ق ر پرەزيدەنتى قاسىم-جومارت توقايەۆ فرانسيا پرەزيدەنتى ەممانيۋەل ماكرونمەن كەلىسسوزدەردىڭ قورىتىندىسى تۋرالى باياندادى.

كەيىنىرەك ە. ماكرون X الەۋمەتتىك جەلىسىندە قازاقستان مەن فرانسيا قارىم-قاتىناستارىن دامىتىپ، جاڭا قادامدار جاساۋعا دايىن ەكەنىن اتاپ ءوتتى.