ماكرون مەن ستارمەر كەلەسى اپتادا ۆاشينگتونعا بارادى
استانا. KAZINFORM - اق ءۇيدىڭ باسپا ءسوز حاتشىسى كارولين ليۆيتت ترامپ دۇيسەنبىدە ماكرونمەن جانە بەيسەنبىدە ستارمەرمەن كەزدەسەتىنىن مالىمدەدى، دەپ حابارلايدى Kazinform ءتىلشىسى.
فرانسيا پرەزيدەنتى ەممانۋەل ماكرون مەن ۇلىبريتانيا پرەمەر- ءمينيسترى كير ستارمەر كەلەسى اپتادا ۆاشينگتونعا بارىپ، ا ق ش پرەزيدەنتى دونالد ترامپپەن كەزدەسەدى.
ساپار الدىندا ەكى ەۋروپالىق كوشباسشى ۋكراينا پرەزيدەنتى ۆلاديمير زەلەنسكيمەن سويلەستى، ول ەۋروپادا تۇراقتى بەيبىتشىلىكتى قامتاماسىز ەتۋ ءۇشىن سەنىمدى قاۋىپسىزدىك كەپىلدىگى قاجەت ەكەنىن اتاپ ءوتتى.
ءۇش كوشباسشى رەسەي مەن ۋكراينا اراسىنداعى قاقتىعىستى توقتاتۋ ءۇشىن بەيبىت كەلىسسوزدەردىڭ پەرسپەكتيۆالارىن تالقىلايدى، دەپ حابارلادى ا ق ش- تىڭ ۇلتتىق قاۋىپسىزدىك جونىندەگى كەڭەسشىسى مايك ۋولتس.
ا ق ش ەۋروپانىڭ قاتىسۋىنسىز رەسەيمەن بىتىمگەرشىلىك كەلىسسوزدەردى العا جىلجىتىپ جاتىر دەپ الاڭداعان ەۋروپالىق كوشباسشىلار 17 - اقپاندا پاريجدە توتەنشە سامميتكە جينالدى. 19-اقپاندا كەڭەيتىلگەن قۇرامداعى كەزدەسۋ ءوتتى، ودان كەيىن ماكرون فرانسيا مەن ونىڭ وداقتاستارىنىڭ ۋكرايناعا قاتىستى «ءبىرتۇتاس» ۇستانىمىن قۋاتتادى.
بۇعان دەيىن ترامپتىڭ ۋكراينانى پرەزيدەنتتىك سايلاۋ وتكىزۋگە شاقىرىپ، ەلدى قۇتقارۋ ءۇشىن تەز ارادا بىتىمگەرشىلىك كەلىسىمىن تالاپ ەتكەنى حابارلانعان بولاتىن.
