ماكرون: پالەستيناعا قاتىستى ب ۇ ۇ كونفەرەنسياسى كەيىنگە شەگەرىلدى
استانا. KAZINFORM - ب ۇ ۇ- نىڭ نيۋ- يوركتەگى شتاب- پاتەرىندە 17-ماۋسىمدا ءوتۋى ءتيىس بولعان تاياۋ شىعىس بويىنشا حالىقارالىق كونفەرەنتسيا «لوگيستيكا جانە قاۋىپسىزدىككە بايلانىستى ماسەلەلەرگە» وراي كەيىنگە قالدىرىلدى، دەپ جازادى ت ا س س.
بۇل تۋرالى فرانسيا پرەزيدەنتى ەممانيۋەل ماكرون ەليسەي سارايى تاراتقان باسپا ءسوز ءماسليحاتىندا ءمالىم ەتتى.
- ءبىز بۇل كونفەرەنسيانى لوگيستيكا مەن قاۋىپسىزدىككە بايلانىستى كەيىنگە شەگەرۋگە ءماجبۇرمىز، سەبەبى پالەستينا اۆتونومياسىنىڭ باسشىلارى ب ۇ ۇ- عا كەلە المايدى. الايدا كونفەرەنسيا جاقىن ارادا مىندەتتى تۇردە وتەدى. الداعى كۇندەرى ءبىز وڭىرلىك كوشباسشىلارمەن، ەڭ الدىمەن ساۋد ارابياسىمەن بىرلەسە وتىرىپ، جاڭا كۇندى بەلگىلەيمىز، - دەدى ماكرون.
فرانسيا پرەزيدەنتى بۇل كەيىنگە شەگەرۋ فرانسيانىڭ پالەستينانىڭ مەملەكەتتىك دەربەستىگىن مويىنداۋعا جانە يزرايلمەن قاقتىعىستى شەشۋدىڭ «ەكى مەملەكەت» قاعيداتىن جۇزەگە اسىرۋعا دەگەن نيەتىنە ەشقانداي كۇمان كەلتىرمەيتىنىن اتاپ ءوتتى.
- ءبىزدىڭ ماقساتىمىز - يزرايلدىڭ بار ەكەنىن جانە ونىڭ قاۋىپسىزدىگىن مويىندايتىن، دەميليتاريزاتسيالانعان پالەستينا مەملەكەتىن قۇرۋ. ول مەملەكەت حالىقارالىق قولداۋعا يە بولۋى كەرەك، - دەدى ول.
پالەستينا ماسەلەسى جونىندەگى كونفەرەنسيا
17- 20- ماۋسىم ارالىعىندا ساۋد ارابياسى مەن فرانتسيا بۇۇ شتاب- پاتەرىندە جوعارى دەڭگەيدەگى كونفەرەنتسيا وتكىزۋى ءتيىس بولعان. ونىڭ ماقساتى - يزرايل مەن پالەستينا اراسىنداعى قاقتىعىستى شەشۋدە «ەكى مەملەكەت» قاعيداتىن ىلگەرىلەتۋ ءۇشىن جاھاندىق كۇش- جىگەرگە سەرپىن بەرۋ.
بۇعان دەيىن ماكرون بۇل جوعارى دەڭگەيدەگى فورۋم پالەستينا مەملەكەتتىگىن مويىنداۋ ۇدەرىسىنە جانە يزرايلدىڭ بەيبىت ءارى قاۋىپسىز ءومىر ءسۇرۋ قۇقىعىن تانۋعا جاڭا سەرپىن بەرەدى دەپ مالىمدەگەن ەدى.
قازىرگى تاڭدا پالەستينا مەملەكەتى ب ۇ ۇ- عا مۇشە 148 ەل تاراپىنان مويىندالعان. 95 ەلدە پالەستينانىڭ ەلشىلىكتەرى مەن تۇراقتى وكىلدىكتەرى جۇمىس ىستەيدى.
«ەكى حالىققا - ەكى مەملەكەت» قاعيداتى 1967 -جىلعى شەكارالار شەڭبەرىندە استاناسى شىعىس يەرۋساليمدە ورنالاسقان، يزرايلمەن بەيبىت ءومىر سۇرۋگە دايىن تاۋەلسىز پالەستينا مەملەكەتىن قۇرۋدى كوزدەيدى.
بۇعان دەيىن ماكرون گازا بەيبىت تۇرعىندارى شەككەن ازاپ اياقتالۋى ءتيىس ەكەنىن اتاپ وتكەن ەدى.
