ماجىلىستە بۇگىن قانداي زاڭ جوبالارى تالقىلانادى

استانا. KAZINFORM - بۇگىن ءماجىلىستىڭ جالپى وتىرىسىندا دەپۋتاتتار 3 زاڭدى ءبىرىنشى وقىلىمدا، ال 2 زاڭدى ەكىنشى وقىلىمدا تالقىلايدى.

اتاپ ايتقاندا، دەپۋتاتتار ءبىرىنشى وقىلىمدا «نىسانالى كاپيتال قورلارى (ەنداۋمەنت- قورلار) تۋرالى» زاڭ جوباسىن تالقىلايدى. بايانداماشى - عىلىم جانە جوعارى ءبىلىم ءمينيسترى ساياسات نۇربەك.

جاڭا زاڭ جوباسى ۇكىمەتپەن نىسانالى كاپيتال قورلارى مەن ەنداۋمەنت- قورلاردى قۇرۋ جانە ولاردىڭ قىزمەت ەتۋىنىڭ قۇقىقتىق نەگىزىن قالىپتاستىرۋ ءۇشىن ازىرلەنگەن. ەنداۋمەنت- قورلاردى باسقارۋ ءۇشىن ينۆەستيتسيالىق تابىس پەن مەسەناتتىق قىزمەت نىساندارىن قارجىلاندىرۋدى قامتاماسىز ەتەتىن كوممەرتسيالىق ەمەس ۇيىم رەتىندە ماقساتتى كاپيتال قور قۇرۋ ۇسىنىلادى. وسى زاڭ جوباسىنا ىلەسپە رەتىندە ازاماتتىق كودەكسكە، «ءبىلىم تۋرالى»، «قايىرىمدىلىق تۋرالى» جانە «عىلىم مەن تەحنولوگيالىق ساياسات تۋرالى» زاڭدارعا وزگەرىستەر ەنگىزۋ قاراستىرىلعان.

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە نىسانالى كاپيتال قورلارىنىڭ (ەنداۋمەنت- قورلاردىڭ) قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى تۋرالى دا عىلىم ءمينيسترى باياندايدى.

جالپى وتىرىستا دەپۋتاتتارعا ىشكى ىستەر ورگاندارىنىڭ قىزمەتى سالاسىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا تۇزەتۋلەردى ءبىرىنشى وقىلىمدا قاراۋ ۇسىنىلادى. اتالعان زاڭ جوباسى قازاقستان رەسپۋبليكاسى پرەزيدەنتىنىڭ 2022 -جىلعى 13-ساۋىردەگى «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىعىن ىسكە اسىرۋ ماقساتىمەن ازىرلەنگەن. وزگەرىستەر قولدانىستاعى 16 زاڭعا ەنگىزىلەدى. بۇل زاڭ جوباسى بويىنشا دەپۋتاتتار الدىنا ىشكى ىستەر ءمينيسترىنىڭ مىندەتىن اتقارۋشى سانجار ءادىلوۆ شىعادى.

سونىمەن قاتار كۇن تارتىبىندە «قازاقستان رەسپۋبليكاسىنىڭ اۋماقتىق قورعانىس تۋرالى» زاڭ جوباسى دا بار. بۇل قۇجاتپەن اۋماقتىق قورعانىستىڭ قۇقىقتىق نەگىزدەرى، ونىڭ ماقساتتارى، مىندەتتەرى مەن قاعيداتتارى، مەملەكەتتىك ورگانداردىڭ، ۇيىمدار مەن ازاماتتاردىڭ وكىلەتتىكتەرى مەن جاۋاپكەرشىلىگى ايقىندالادى. زاڭ جوباسىن دەپۋتاتتار ەكىنشى وقىلىمدا قارايدى. بايانداماشى - حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى ماكسيم روجين. ول «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اۋماقتىق قورعانىس ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ ەكىنشى وقىلىمى كەزىندە ارىپتەستەرىنىڭ الدىندا ءسوز سويلەپ، ساۋالدارىنا جاۋاپ بەرەدى.

جالپى وتىرىسقا جوعارىدا اتالعان مينيسترلەردەن بولەك وزگە دە ۆەدومستۆولاردىڭ ۆيتسە-مينيسترلەرى، ورىنباسارلارى كەلەدى. ولار جالپى وتىرىس اياقتالعاننان كەيىن ب ا ق وكىلدەرىنىڭ ساۋالىنا جاۋاپ بەرەدى.

ايتا كەتەيىك، وتكەن اپتانىڭ سارسەنبىسى كۇنى وتكەن ءماجىلىستىڭ جالپى وتىرىسىندا دەپۋتاتتار جاڭا سالىق كودەكسىن تالقىعا سالعان ەدى. قۇجاتتى دەپۋتاتتارعا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين تانىستىرعان بولاتىن. قۇجات جوباسىن 4 ساعات بويى تالقىلاعان دەپۋتتاردىڭ باسىم كوپشىلىگى جاڭا رەداكتسيانى ءبىرىنشى وقىلىمدا قولداپ داۋىس بەردى. قالىس قالعاندار سانى - 9، قارسى بولعاندار - 7,1 دەپۋتات داۋىس بەرمەدى.

ق ق س سالىناتىن اينالىمنىڭ تومەنگى شەگى 40 ميلليون تەڭگە بولۋى مۇمكىن.

وسى شەشىمنىڭ اياسىندا ۇكىمەت جەكە كاسىپكەرلىكتى تىركەۋ ءراسىمىن قاتاڭداتپاق.

سونداي-اق، ول ءسان-سالتانات سالىعى كىمدەرگە سالىناتىن ايتتى. ناقتىراق ايتساق، قۇنى 450 ميلليون تەڭگەدەن اساتىن جىلجىمايتىن مۇلىك يەلەرى ۇلعايتىلعان سالىق تولەيدى.

ال جىلدىق تابىسى 33,4 ميلليون تەڭگەدەن اساتىن ازاماتتار تابىسىنىڭ 15 پايىزىن سالىققا تولەۋى مۇمكىن.

ۇسىنىلىپ وتىرعان رەفورما بويىنشا، سالىق ەسەبىن تاپسىراتىندار سانى 30 پايىزعا قىسقارماق.

اۆتور

مارلان جيەمباي