ماجىلىسمەندەر «ەرتىس ورمانى» قورىعىنىڭ ماسەلەسىمەن تانىستى
استانا. KAZINFORM - ءماجىلىس دەپۋتاتتارى، «AMANAT» پارتياسى فراكسياسىنىڭ مۇشەلەرى نۇرجان اشىمبەتوۆ، ۆەرا كيم جانە جارقىنبەك امانتاي ۇلى پاۆلودار وبلىسىنداعى «ەرتىس ورمانى» مەملەكەتتىك تابيعي ورمانىنا باردى.
مۇندا دەپۋتاتتار ورمانشىلارمەن كەزدەسىپ، قورىقتىڭ الداعى ءورت قاۋپى كەزەڭىنە دايىندىعىن تەكسەردى.
«ەرتىس ورمانى» باس ديرەكتورىنىڭ مىندەتىن اتقارۋشى قازبەك امەتوۆتىڭ ايتۋىنشا، تەحنيكا پاركىن جاڭارتۋ جۇمىسى جالعاسىپ جاتىر. اتاپ ايتقاندا، 8 تراكتور ساتىپ الىندى.
- ءبىز بۋراباي پاركىنەن كەيىن ەكىنشى بولىپ، ەرتە انىقتاۋ جۇيەسىن ورناتتىق. بيىل ءساۋىر ايىنان باستاپ 23 بەينەباقىلاۋ مۇناراسى ىسكە قوسىلدى. ونىڭ كەيبىرى اقپاراتتى ينتەرنەت ارقىلى ەمەس، تەلەفون جەلىسى ارقىلى جىبەرەدى. ماسەلەن، 70 ءورت وشاعىنىڭ 50 ءى وسى كامەرالار ارقىلى انىقتالدى. قىزمەتكەرلەردى جاڭا تەحنيكامەن قامتاماسىز ەتۋ جۇمىسىن جالعاستىرۋ - اسا ماڭىزدى، - دەدى ول.
ءوز كەزەگىندە، «ەرتىس ورمانى» ورمان شارۋاشىلىعىن قورعاۋ قىزمەتىنىڭ ءبولىم باسشىسى قوبىلاندى اتىعايەۆ بىلتىر ورمانشىلاردىڭ جالاقىسى وسكەنىمەن، وسى سالادا جۇمىس ىستەيتىن جۇرگىزۋشىلەر مەن ءورت سوندىرۋشىلەردىڭ ەڭبەكاقىسى جوعارىلاماعانىن ايتتى.
- سالا ارداگەرلەرى بىرتىندەپ زەينەتكە شىعىپ جاتىر. ال جاستار قاۋىمى بىزگە جۇمىس ىستەۋگە كەلمەيدى. جۇرگىزۋشىلەر، تراكتورشىلار، تازالاۋشىلار جانە وزگە دە جۇمىسشىلار ازاماتتىق قىزمەتكەرلەر ساناتىنا جاتپايدى. بۇعان قوسا، ولار اۋىلدىق جەردە جۇمىس ىستەگەنى ءۇشىن 25 پايىز ۇستەمەاقى دا الا المايدى. ولاردىڭ مەديتسينالىق جاردەماقىسى جوق. جالاقىسى تومەن جۇمىس ورىندارىندا ادامدار ۇزاق ۋاقىت ەڭبەك ەتپەيدى، - دەدى ول.
بۇل رەتتە، ءماجىلىس دەپۋتاتى نۇرجان اشىمبەتوۆ مەملەكەت باسشىسىنىڭ تاپسىرماسى بويىنشا 2023-جىلعى 1-شىلدەدەن باستاپ تەك ءورت سوندىرۋشىلەردىڭ جالاقىسى كوتەرىلگەنىن ءتۇسىندىردى. بولاشاقتا تەحنيكالىق پەرسونالدىڭ جالاقىسىن 2 ەسە ءوسىرۋ قاجەت.
- ءبىزدىڭ ماقسات-مىندەتىمىز - قايعىلى وقيعالاردان ساباق الىپ، جاعدايدىڭ قايتالانۋىنا مۇلدەم جول بەرمەۋ. ءتيىستى جۇمىس جۇيەلى جۇرگىزىلۋدە. جابدىقتاردى جاڭارتۋ ماسەلەسى دە نازاردان تىس قالعان جوق. ورمان شارۋاشىلىعى مەكەمەلەرىن تولعاندىرعان بۇل ماسەلە ونەركاسىپتى دامىتۋ قورى ۇسىناتىن 3 پايىزدىق ليزينگ ارقىلى شەشىلەدى، - دەدى دەپۋتات.
ال دەپۋتات ۆەرا كيمنىڭ ايتۋىنشا، ورمان شارۋاشىلىعى سالاسىنا كادر تارتۋ ءۇشىن «ديپلوممەن اۋىلعا» سىندى ءتۇرلى مەملەكەتتىك باعدارلامالار ۇسىناتىن مۇمكىندىكتەردى پايدالانۋ قاجەت.
- ورمان شارۋاشىلىعى بەيىنىنە سايكەس كەلەتىن جوعارى وقۋ ورىندارىن ءتامامداعان جاس ماماندار شالعايداعى ورمان شارۋاشىلىقتارىنا جۇمىسقا ورنالاسۋعا اسىقپايدى. سەبەبى ولارعا باسپانا مەن جايلى ءومىر ءسۇرۋ جاعدايىن ۇسىناتىن مۇمكىندىك جوق. كادرلاردى ۇستاپ قالۋ ءۇشىن سالادا جۇمىس ىستەپ جاتقان جەرگىلىكتى جاس ماماندارعا جانە جالپى جاستارعا اۋدان اكىمدىكتەرىنەن اۋداندا سۇرانىسقا يە ماماندىقتار بويىنشا ءبىلىم بەرۋ گرانتتارىن ۇسىنۋ، بىلىكتىلىكتى ارتتىرۋ كۋرستارىن ۇيىمداستىرۋ، كوتەرمە جاردەماقى تولەۋ، تۇرعىن ءۇي، جۇمىس ورنىن ۇسىنۋ تاجىريبەسىن كەڭەيتۋ قاجەت، - دەدى ول.
ايتا كەتەيىك، بۇعان دەيىن دەپۋتاتتار ەكىباستۇز قالاسىنا جۇمىس ساپارىمەن بارىپ، جىلۋ جەلىلەرىن قايتا قۇرۋ جانە جەو جوندەۋ جۇمىسىنىڭ بارىسىمەن تانىستى. سونىمەن قاتار، ماجىلىسمەندەر باياناۋىل، ۋسپەن، تەرەڭكول جانە وزگە دە اۋدانداردىڭ تۇرعىندارىمەن ءبىرقاتار كەزدەسۋ وتكىزدى.
