ماجارستانداعى 50 گە جۋىق ەلدىمەكەندە قازاق ۇلتىنىڭ وكىلدەرى تۇرادى
استانا. KAZINFORM - ءماجىلىس ءتوراعاسى ەرلان قوشانوۆ ماجارستان ۇلتتىق اسسامبلەياسىنىڭ قازاقستانمەن ىنتىماقتاستىق جونىندەگى توبىنىڭ جەتەكشىسى شاندور فازەكاش باستاعان دەلەگاتسيامەن كەزدەستى، دەپ حابارلايدى ءماجىلىستىڭ باسپا ءسوز قىزمەتى.
ماجار دەپۋتاتتارىن قارسى العان ەرلان قوشانوۆ قازاقستان مەن ماجارستاندى بەرىك ستراتەگيالىق سەرىكتەستىك بايلانىستىراتىنىن اتاپ ءوتتى.
- قازاقستان ەۋروپالىق وداقتاعى ستراتەگيالىق ارىپتەسىمىز ماجارستانمەن تىعىز ىنتىماقتاستىقتى جوعارى باعالايدى. باۋىرلاس ەلدەرىمىزدى تاۋەلسىزدىك، تاتۋلىق پەن ۇلتتىق مادەنيەتتىڭ ورتاق قۇندىلىقتارى بىرىكتىرەدى. ورتاق تاريحي مۇرامىز جەمىستى ديالوگ پەن سان سالاداعى ىقپالداستىققا ارقاۋ بولۋدا. ءبىزدىڭ كوشباسشىلارىمىزدىڭ اراسىنداعى سەنىمدى قارىم-قاتىناس - وسىنىڭ كەپىلى. قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ 2024 -جىلعى قاراشادا بۋداپەشت قالاسىنا جاساعان العاشقى مەملەكەتتىك ساپارى ستراتەگيالىق ارىپتەستىگىمىزدىڭ 10 جىلدىعىمەن تۇسپا-تۇس كەلۋىنىڭ سيمۆولدىق ءمانى بار، - دەدى ءماجىلىس ءتوراعاسى.
ەرلان قوشانوۆ ءماجىلىستىڭ ماجارستان ۇلتتىق اسسامبلەياسىمەن پارلامەنتارالىق بايلانىستى دامىتۋعا ۇلكەن ءمان بەرەتىنىن باسا ايتتى. وتكەن جىلى بۋداپەشت قالاسىنا ساپار بارىسىندا ەكى ەل پارلامەنتتەرى اراسىنداعى ىنتىماقتاستىق تۋرالى كەلىسىمگە قول قويىلىپ، ەكىجاقتى قارىم-قاتىناستى دامىتۋعا بەرىك نەگىز بولدى. سونداي-اق پالاتا سپيكەرى ماجار دەپۋتاتتارىنىڭ قازاقستانمەن پارلامەنتارالىق دوستىق توبى اياسىنداعى بەلسەندى جۇمىسىنا نازار اۋدارىپ، شاندور فازەكاشتى قازاقستانمەن دوستىق توبىنىڭ ءتوراعاسى بولىپ سايلانۋىمەن قۇتتىقتادى.
ءوز كەزەگىندە شاندور فازەكاش ماجار قىپشاقتارىنىڭ قازاق حالقىنا ىستىق سالەمىن جەتكىزدى.
ونىڭ ايتۋىنشا، ءقازىر ولار ماجارستاندا 50 گە جۋىق ەلدىمەكەندە تۇرىپ جاتىر جانە اتا- بابالارىنىڭ تاريحي وتانىمەن بايلانىسىن ەرەكشە باعالايدى.
- ءبىز ءۇشىن ءتۇپ-تامىرىمىزدىڭ ءبىر بولۋىنىڭ ءمانى زور. وسى دەرەكتى، وسى مۇرانى بولاشاق ۇرپاققا جەتكىزۋگە تىرىسامىز. 1990 -جىلدان باستاپ تاريحي بايلانىسىمىزدى قايتا ورناتىپ، ەلدەرىمىز بەن حالىقتارىمىز اراسىنداعى قارىم-قاتىناستى قالپىنا كەلتىرە باستادىق، مۇنى شىنىمەن جوعارى باعالايمىز. ماجار قىپشاقتارى جانە بۇكىل ماجار حالقى ءۇشىن قازاقستاننىڭ تاۋەلسىز ەل بولۋى ماڭىزدى. قازىر وركەندەگەن مەملەكەتكە اينالىپ كەلە جاتىر. سونىڭ ارقاسىندا ءبىز ديپلوماتيا، ەكونوميكا جانە مادەنيەت سالالارىندا بەرىك بايلانىس ورناتا الدىق، - دەدى ماجارستان دەلەگاتسياسىنىڭ باسشىسى.
تاراپتار اۋىل شارۋاشىلىعى، ەكولوگيا، مادەني- گۋمانيتارلىق باعىتتاردا ىنتىماقتاستىقتى دامىتۋ پەرسپەكتيۆالارىن تالقىلادى.
ءماجىلىس ءتوراعاسى ەلدەرىمىزدىڭ تۇركى مەملەكەتتەرى ۇيىمى مەن تۇركپا اياسىنداعى جەمىستى ىقپالداستىعىن، ەۋروپا كەڭەسى پارلامەنتتىك اسسامبلەياسى جانە باسقا دا كوپجاقتى قۇرىلىمدار اياسىندا ماجار ارىپتەستەرمەن بايلانىستى دامىتۋدىڭ ماڭىزدىلىعىن اتاپ ءوتتى.
كەزدەسۋ سوڭىندا ەرلان قوشانوۆ مەملەكەت باسشىسى قاسىم-جومارت توقايەۆتىڭ اتىنان قازاقستان مەن ماجارستان اراسىنداعى دوستىق پەن ىنتىماقتاستىقتى نىعايتقانى ءۇشىن شاندور فازەكاشقا II دارەجەلى «دوستىق» وردەنىن تابىس ەتتى.
وسىعان دەيىن ماجارستاننىڭ قازاقستاندا ا ە س سالۋعا ءوز تەحنولوگياسىن ۇسىنعانى تۋرالى جازدىق.
