ماجارستاندا جەمىس تاپشىلىعى: باعا ءوسىپ، يمپورت ارتۋى مۇمكىن
استانا. KAZINFORM - بيىل ماجارستاندا جەمىس- جيدەك داقىلدارىنىڭ ءتۇسىمى كۇرت تومەندەپ، بۇل باعانىڭ ءوسۋى مەن ەكسپورت كولەمىنىڭ ازايۋىنا سەبەپ بولدى، دەپ حابارلايدى ازەرتادج.
ەلدەگى باعباندار قاۋىمداستىعىنىڭ مالىمەتىنشە، كوكتەمدەگى ۇسىك، قۋاڭشىلىق جانە تەمپەراتۋرانىڭ كۇرت وزگەرۋى ورىك، شابدالى جانە الما ونىمدەرىنە ەلەۋلى زيان كەلتىرگەن. جەكەلەگەن ايماقتاردا جەمىس شىعىنى ادەتتەگى ءتۇسىمنىڭ 60-80 پايىزىنا جەتكەن.
قاۋىمداستىق ۇسىنعان ەسەپكە سايكەس، اسىرەسە ورتالىق جانە سولتۇستىك- شىعىس وڭىرلەر قاتتى زارداپ شەككەن. بۇل ايماقتارداعى كوپتەگەن باقتاردى ءساۋىر ايىندا ۇسىك شالعان. جاز مەزگىلى دە ەرەكشە ىستىق ءارى قۇرعاق بولىپ، جاعدايدى ودان ءارى قيىنداتتى. اۋىل شارۋاشىلىعى ماماندارىنىڭ سوزىنشە، ىلعال جەتىسپەگەندىكتەن كوپتەگەن اعاش جەمىسىن ءتۇيىن بەرە باستاعاندا، ەرتە كەزەڭدە-اق تاستاعان.
ماجارستان اۋىل شارۋاشىلىعى مينيسترلىگى فەرمەرلەرگە قولداۋ كورسەتىپ، شىعىننىڭ ءبىر بولىگىن وتەۋ مۇمكىندىگىن جاريالادى. الايدا ساراپشىلار بۇل بارلىق ماسەلەنى شەشپەيدى دەپ ەسكەرتىپ جاتىر، سەبەبى اۋا رايىنىڭ كۇرت وزگەرىستەرى جيىلەپ بارادى.
ماجارستان ءداستۇرلى تۇردە ەۋروپالىق وداق ەلدەرىنە كوپ مولشەردە جەمىس ەكسپورتتايتىن، الايدا بيىل جەتكىزۋ كولەمى ەداۋىر قىسقارۋى مۇمكىن. جەرگىلىكتى نارىقتاردا باعا ءوسىپ، كورشىلەس ەلدەردەن يمپورت ارتۋى مۇمكىن. ساراپشىلار تۇتىنۋشىلارعا كۇزگە قاراي توساپ، شىرىن جانە جاڭا پىسكەن جەمىستەردىڭ قىمباتتاۋىنا دايىن بولۋعا كەڭەس بەرەدى.
بۇدان بۇرىن ماجارستان ەۋروپاداعى ەڭ تىنىش ءارى قاۋىپسىز تۋريستىك باعىتتاردىڭ ءبىرى رەتىندەگى بەدەلىن تاعى ءبىر مارتە راستاعانىن جازعانبىز. تۋريزم سالاسى ماماندارىنىڭ باعالاۋىنشا، بۇل ەلدە قىلمىس دەڭگەيى تومەن ءارى شەتەلدىك قوناقتار ءۇشىن جايلى.
