ماڭعىستاۋلىق جىگىتتىڭ شىمكەنتتە قىز الىپ قاشقان ءساتى ۆيدەوعا ءتۇسىپ قالعان
شىمكەنت. KAZINFORM - ۇيلەنبەكشى بولعان ەر ادام قاماۋعا الىنىپ، تەرگەۋ ارەكەتتەرى جۇرگىزىلىپ جاتىر.
شىمكەنت پوليتسياسى الەۋمەتتىك جەلىدە قىز الىپ قاشقان جىگىتتىڭ ۆيدەوسىن جاريالادى. وندا جىگىت بويجەتكەندى كوتەرىپ الىپ، ونى كولىكتىڭ ىشىنە كىرگىزگەن. سودان سوڭ بەلگىسىز باعىتقا قاراي ءجۇرىپ كەتكەن.
پوليتسيا وقيعا تۋرالى حابار الىسىمەن جەدەل-ىزدەستىرۋ شارالارىنا كىرىستى. Toyota Alphard كولىگىن ۇستاۋعا تۇران اۋداندىق پوليتسيا باسقارماسىنىڭ جەدەل ۋاكىلدەرى جۇمىلدىرىلىپ، كورشى وڭىرلەرگە باعىتتاما جىبەرىلدى. قابىلدانعان شارالاردىڭ ناتيجەسىندە اۆتوكولىك جارتى تاۋلىك ىشىندە الماتى- سامارا تاس جولىنداعى جالاعاش اۋىلىنىڭ ماڭىندا ۇستالدى. ەر ادام قاماۋعا الىنىپ، تەرگەۋ ارەكەتتەرى جۇرگىزىلۋدە.
«جاستار الەۋمەتتىك جەلىدە تانىسقان. بىرنەشە اي بويى عالامتور ارقىلى سويلەسكەن. سودان ماڭعىستاۋ وبلىسىنىڭ 22 جاستاعى تۇرعىنى ۇيلەنۋگە شەشىم قابىلدايدى. جاس جىگىت شىمكەنتكە كەلىپ، قىزدىڭ ديپلومالدى پراكتيكادان ءوتىپ جاتقان مەديتسينالىق مەكەمەسىنە بارعان. انىقتاما بيۋروسىنا «جەتكىزۋشى» ەكەنىن ايتىپ، بويجەتكەنگە سىرتقا شىعۋىن وتىنگەن. قىز دالاعا شىققان بويدا ونى كۇشتەپ كولىككە وتىرعىزىپ اكەتكەن»، - دەلىنگەن شىمكەنت قالاسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
ايتا كەتەيىك، بۇدان الدىن شىمكەنتتە قالىڭدىقتى ۇرلاۋ بويىنشا سوتقا دەيىنگى تەرگەپ-تەكسەرۋ باستالعانىن جازعان بولاتىنبىز.
