19:53, 06 - ءساۋىر 2025 | GMT +5
ماڭعىستاۋلىق جيھانكەز تۇركى ەلدەرىن ۆەلوسيپەدپەن ارالاۋعا جولعا شىقتى
اقتاۋ. KAZINFORM - ماڭعىستاۋلىق جيھانكەز راببيم بوراشيەۆ «اقتاۋ - تۇركى الەمىنىڭ مادەني استاناسى» مادەني جىلى اياسىندا تۇركى مەملەكەتتەرىن ۆەلوسيپەدپەن ارالاپ شىقپاق.
جيھانكەز قوڭىرات-حيۋا- ۇرگەنىش- سامارقاند- تاشكەنت-تۇركىستان- تاراز- بىشكەك- الماتى- اشحاباد قالالارىنا بارىپ، 4500 شاقىرىم ءجۇرۋدى جوسپارلايدى.
- اقتاۋ قالاسى كۇللى تۇركى الەمىنىڭ مادەني استاناسى اتانىپ جاتىر. وسىعان وراي، پاريجدەگى ساپارىم سەكىلدى تۇركى ەلدەرىنىڭ ىنتىماقتاستىعىن، بىرلىگىن كورسەتۋ ماقساتىندا جولعا شىقتىم. تۇركى مەملەكەتتەرىنىڭ بىرلىگى بەكەم بولعاي، اق جول تىلەگەن حالىققا العىسىم شەكسىز، - دەيدى راببيم بوراشيەۆ.
بۇعان دەيىن، اقتاۋلىق رۋسلان چۋروۆتىڭ انتاركتيداعا ساياحات جاساعانى تۋرالى جازعان بولاتىنبىز.
