ماڭعىستاۋدا سپورت مەكەمەسىنىڭ باس ەسەپشىسى بيۋدجەتتەن 117 ميلليون تەڭگە جىمقىرعان
اقتاۋ. KAZINFORM - ماڭعىستاۋدا ۇلتتىق سپورت تۇرلەرى ورتالىعىنىڭ باس ەسەپشىسى بيۋدجەت قاراجاتىن جىمقىرعان. ماڭعىستاۋ وبلىسىنىڭ پروكۋراتۋراسى بيۋدجەت قاراجاتىنىڭ جۇمسالۋىنىڭ زاڭدىلىعىن تەكسەرۋ بارىسىندا اتالعان سپورت مەكەمەسىندە جىمقىرۋ فاكتىسىن انىقتادى.
ۇلتتىق سپورت تۇرلەرى ورتالىعىنىڭ باس ەسەپشىسى 2018-2023 -جىلدار ارالىعىندا 117 ميلليون تەڭگە كولەمىندەگى بيۋدجەت قاراجاتىن زاڭسىز يەمدەنگەن. اتالعان دەرەك وبلىس پروكۋراتۋراسىمەن تەرگەلىپ، ناتيجەسىمەن قىلمىستىق ءىس قىلمىستىق كودەكستىڭ 371-بابىنىڭ 2-بولىگى (سالعىرتتىق) جانە 189-بابى 4-بولىگىمەن (جىمقىرۋ) سوتقا جولدانعان.
سوت ۇكىمىمەن ۇلتتىق سپورت تۇرلەرى ورتالىعىنىڭ باسشىسى ءوز مىندەتتەرىن تيىسىنشە ورىنداماۋ فاكتىسى بويىنشا كىنالى دەپ تانىلىپ، «ق ر تاۋەلسىزدىگىنىڭ وتىز جىلدىعىنا بايلانىستى راقىمشىلىق جاساۋ تۋرالى» زاڭعا سايكەس قىلمىستىق جازادان بوساتىلدى. ال مەكەمەنىڭ باس ەسەپشىسى بيۋدجەت قاراجاتىن جىمقىرعانى ءۇشىن 7 جىل باس بوستاندىعىنان ايىرىلدى. سوت ۇكىمى زاڭدى كۇشىنە ەندى.
بۇعان دەيىن ماڭعىستاۋدا ەسىرتكى ساقتالعان جاسىرىن قويمانىڭ تابىلعانىن جازعان ەدىك.
