ماڭعىستاۋدا ۇلتتىق كيىمنەن الەمدىك رەكورد ورنادى
اقتاۋ. KAZINFORM - قازاق حالقىنىڭ مادەني مۇراسىن الەمدىك دەڭگەيدە ناسيحاتتاۋعا وبلىس بويىنشا ءتۇرلى سالا ماماندارى، ەتنوس وكىلدەرى، جاستار مەن قاريالار دا ۇلەس قوستى.
سونداي-اق وزگە وڭىرلەردىڭ تۇرعىندارى دا ارنايى كەلىپ، اتسالىستى.
- مەن وسى شاراعا قاتىسۋ ءۇشىن اتىراۋ قالاسىنان كەلدىم. ەگدە جاستاعى قازاق ايەلىنىڭ ۇلتتىق كيىمىن كيىپ، جاۋلىعىن تارتىپ تۇرمىن. ءوز باسىم تاريحي ساتكە كۋا بولىپ، وسى شاراعا اتسالىسىپ جاتقانىما وتە قۋانىشتىمىن، - دەيدى اتىراۋ قالاسىنىڭ تۇرعىنى جاقسىگۇل قاجبانوۆا.
شاراعا قاتىسۋشىلاردىڭ باستى ماقساتى - قازاق ۇلتىن الەمگە تانىتۋ. ۇلتتىق سالت-ءداستۇردىڭ قايماعى بۇزىلماعان ايماق تۇرعىندارى بۇل جولى بىرلىك پەن تاتۋلىقتى پاش ەتتى.
رەكورد ورناتۋ ءراسىمى كاسپي جاعالاۋىندا ءوتتى. تىركەۋدەن وتكەن قاتىسۋشىلار ارنايى جاساقتالعان الاڭعا جينالىپ، ۇلى بريتانيادان كەلگەن گيننەسس رەكوردتار كىتابىنىڭ رەسمي وكىلدەرى ەسەپ جۇرگىزدى. بىرنەشە ساعاتقا سوزىلعان ساناۋ ناتيجەسىندە، قويىلعان تالاپتاردىڭ تولىق ورىندالعانى راستالىپ، قازاقستاننىڭ جاڭا الەمدىك رەكورد يەسى اتانعانىن دالەلدەيتىن ارنايى سەرتيفيكات تابىستالدى.
وسىلايشا، قازاقتىڭ ۇلتتىق كيىمى گيننەسس رەكوردتار كىتابىنا ەندى.
ماڭعىستاۋ وبلىسىنىڭ اكىمى نۇرداۋلەت قيلىباي بۇل تاريحي وقيعانىڭ ۇلتىمىزدىڭ مادەني مۇراسىن حالىقارالىق دەڭگەيدە تانىتۋداعى ماڭىزىن اتاپ ءوتىپ، جينالعانداردى ۇلىستىڭ ۇلى كۇنىمەن قۇتتىقتادى.
- ۇلىستىڭ ۇلى كۇنىندە تاريحي ءساتتىڭ كۋاسى بولىپ وتىرمىز. قازاق حالقىنىڭ تەرەڭ تاريحى مەن باي مادەني مۇراسىن، ۇلتتىق ءداستۇرىمىزدى جەر جاھانعا پاش ەتتىك. ماڭعاز ماڭعىستاۋىمىزدا قازاقتىڭ ۇلتتىق كيىمىنەن الەمدىك رەكورد ورنادى. وسىناۋ زور جەتىستىكپەنەن بارشا وتانداستارىمىزدى قۇتتىقتايمىن! قازاق حالقىنىڭ مادەنيەتىن ناسيحاتتاۋعا اتسالىسقان باستاماشى توپقا، لوندون قالاسىنان ارنايى كەلگەن گيننەسس رەكوردتار كىتابىنىڭ وكىلدەرىنە جانە رەكورد ورناتۋعا ۇلەس قوسقان بارشا قاتىسۋشىعا العىسىمدى بىلدىرەمىن! مەملەكەت باسشىسى قاسىم-جومارت كەمەل ۇلى توقايەۆ بۋرابايدا وتكەن IV ۇلتتىق قۇرىلتايدا «ۇلتتىق بىرەگەيلىگىمىزدى نىعايتۋ جولىندا ناۋرىز مەيرامىنىڭ ورنى ايرىقشا ەكەنىن اتاپ ءوتتى. پرەزيدەنتىمىزدىڭ باستاماسىمەن ناۋرىز مەرەكەسى تۋرالى جاڭا تۇجىرىمداما ازىرلەندى. ەلىمىز ۇلىستىڭ ۇلى كۇنىن 14-ناۋرىزدان ياعني امال مەرەكەسىنەن باستاپ 10 كۇن بويى اتاپ وتۋدە. كۇن مەنەن ءتۇن تەڭەلىپ، جەر-انا جاڭا كۇيگە ەنىپ، تىرشىلىك اتاۋلى ويانىپ، اينالا مارە-سارە بولاتىن ۇلىستىڭ ۇلى كۇنى - جىل باستاۋى ءاز-ناۋرىز بارشاڭىزعا قۇتتى بولسىن، اعايىن! - دەدى نۇرداۋلەت قيلىباي.
وبلىس اكىمىنە ارنايى سەرتيفيكاتتى تابىستاعان گيننەسس رەكوردتار كىتابىنىڭ رەسمي وكىلى ريچارد ستەننينگ تاماشا ناتيجەگە قول جەتكىزگەن قازاق حالقىن قۇتتىقتادى.
- قۇرمەتتى قازاقستاندىقتار، حالقىڭىزدىڭ باستى مەرەكەسى - ناۋرىز مەيرامىندا رەكورد جاسادىڭىزدار. بۇگىن قازاق ەلىنىڭ سالت-داستۇرگە بەرىك ەكەنىنە، رۋحتى، تالعامى جوعارى حالىق ەكەنىنە كۋا بولدىم. شارا دا وتە جوعارى دەڭگەيدە ۇيىمداستىرىلعان. تاريحي وقيعا جاساۋلارىڭىزبەن شىن جۇرەكتەن قۇتتىقتايمىن! - دەدى ريچارد ستەننينگ.
- بۇگىن قازاق حالقى ءوزىنىڭ ۇلتتىق كيىمىن، سالتىن كورسەتۋ ءۇشىن گيننەسس كىتابىنا ەنۋ ماقساتىندا وسى الاڭعا جينالدىق. مەن وتە باقىتتىمىن! قازاق ۇلتىن الەم تانىسىن! مەن قازاق بولعانىما ماقتانامىن! قازاقستان ماڭگى جاساسىن، - دەيدى اقتاۋ قالاسىنىڭ تۇرعىنى بايان تىلەپوۆا.
ناۋرىز مەرەكەسىنە وراي اقتاۋدا تەڭىز جاعالاۋىندا 30 كيىز ءۇي تىگىلىپ، قولونەر شەبەرلەرىنىڭ جارمەڭكەسى ۇيىمداستىرىلدى.
شارا بارىسىندا ۇلتتىق تاعامدار ۇسىنىلىپ، قازاقشا كۇرەس، توعىزقۇمالاق، اسىق اتۋ سەكىلدى سپورتتىق جارىستار ءوتتى.
امفيتەاتر الاڭىندا ونەرپازدار ءان مەن جىردان شاشۋ شاشىپ، تەاترلاندىرىلعان ۆوكالدى-حورەوگرافيالىق قويىلىم قويدى.
مەرەكەلىك باعدارلاما ەلىمىزگە تانىمال ەسترادا جۇلدىزدارىنىڭ گالا-كونسەرتىمەن جالعاستى.
ايتا كەتەلىك پەتروپاۆلدا گيننەسس رەكوردتار كىتابىنا ەنگەن الەمدەگى ەڭ ۇزىن كوشە جاڭعىرتىلماق.
اۆتور
اياگوز ءىزباساروۆا
