ماڭعىستاۋ وبلىسىندا بالالاردىڭ 37 پايىزىنىڭ ءبىلىمى تومەن ەكەنى انىقتالعان
استانا. KAZINFORM - مەملەكەت باسشىسى قاسىم-جومارت توقايەۆ ماڭعىستاۋ وبلىسىنىڭ الەۋمەتتىك- ەكونوميكالىق دامۋى جونىندەگى كەڭەس بارىسىندا وڭىردەگى ءبىلىم ساپاسىن سىنادى.
- ايماقتا ءبىلىم ساپاسىن جاقسارتۋ ءۇشىن ءبىرقاتار شارا قابىلداندى. ءبىراق جۇمىستىڭ ناتيجەسى كوڭىل كونشىتپەي تۇر. ەكىدەن التى جاسقا دەيىنگى بالالاردىڭ 93,9 پايىزى بالاباقشاعا بارادى، ياعني، 46 مىڭ بالا. ءبىراق ورىن تاپشىلىعى ءالى جويىلعان جوق. 3,5 مىڭعا جۋىق بالا كەزەكتە تۇر. ءبىلىم ساپاسىنا قاتىستى تۇيتكىلدەر بار، - دەدى پرەزيدەنت.
وسى رەتتە ول بىلتىر مەكتەپتەگى ءبىلىم دەڭگەيىن باعالاۋ ءۇشىن وبلىستا ارنايى تەست وتكىزىلگەنىن ايتىپ ءوتتى. وعان قاتىسقان بالالاردىڭ 37 پايىزىنىڭ ءبىلىمى تومەن ەكەنى انىقتالدى. بىلتىرعى ۇلتتىق ءبىرىڭعاي تەستىلەۋدىڭ ناتيجەلەرى دە ءماز ەمەس. 1,5 مىڭعا جۋىق بالا، ياعني، 20 پايىزى وقۋعا تۇسۋگە قاجەتتى ەڭ تومەنگى بالدىڭ ءوزىن جيناي الماعان.
- بۇل - ەلىمىزدەگى ەڭ ناشار كورسەتكىشتىڭ ءبىرى، - دەدى پرەزيدەنت.
سونداي-اق مەملەكەت باسشىسى بيىل قاڭتار ايىنداعى تەستىلەۋگە 8 مىڭنان استام وقۋشى قاتىسقاننىن ونىڭ ۇشتەن ءبىرى شەكتى كورسەتكىشتەن وتە الماعانىن ايتىپ ءوتتى.
پرزيدەنتتىڭ ايتۋىنشا، وبلىستاعى اۋىل جانە قالا مەكتەپتەرىنىڭ اراسىنداعى ءبىلىم ساپاسىنىڭ الشاقتىعى - وزەكتى ماسەلەنىڭ ءبىرى. ءتىپتى اقتاۋ مەن جاڭاوزەندەگى مەكتەپتەردىڭ ءبىلىم دەڭگەيىندە ايىرماشىلىق بار. مەكتەپتەگى ورىن تاپشىلىعى ازايماق تۇگىلى كوبەيىپ بارادى. قازىر 14 مىڭعا جۋىق ورىن جەتىسپەيدى. ءۇش اۋىسىمدى جانە اپاتتى مەكتەپتەر ماسەلەسى ءالى كۇنگە دەيىن شەشىمىن تاپقان جوق.
«سامۇرىق- قازىنا» قورى وبلىس اكىمدىگىمەن بىرلەسىپ، جايلى مەكتەپتەردىڭ قۇرىلىسىن تەزدەتۋى قاجەت. بۇعان قوسا ساپالى ستاندارتتى مەكتەپ سالۋ جۇمىسىن جالعاستىرۋ كەرەك. جالپى وسى سالاداعى تۇيتكىلدەردى شەشۋ ءۇشىن ءبىلىم بەرۋ جۇيەسىن دامىتۋدىڭ 2023-2029 -جىلدارعا ارنالعان وڭىرلىك جول كارتاسى قابىلداندى. الايدا ناقتى ناتيجە جوق. جول كارتاسىن ساپالى ءارى تولىق جۇزەگە اسىرۋ ءۇشىن جۇمىستى بارىنشا جانداندىرۋ قاجەت، - دەدى قاسىم- جومارت توقايەۆ.
مەملەكەت باسشىسى ۇكىمەتكە جاۋاپتى مەملەكەتتىك ورگاندارمەن بىرلەسىپ، وقۋشىلاردىڭ قاۋىپسىزدىگىن قاتاڭ باقىلاۋعا الۋدى تاپسىردى.
پرەزيدەنت وبلىستىڭ دەنساۋلىق ساقتاۋ جۇيەسىندە كەمشىلىكتەر بار ەكەنىن ايتتى.
- سوڭعى جىلدارى ايماقتا نارەستەلەردىڭ ءولىمى ازايىپ كەلەدى. ءبىراق ەلدەگى جاعدايمەن سالىستىرساق، بۇل كورسەتكىش ءبارىبىر جوعارى؛ قازاقستان بويىنشا - 6,01. ايماقتا قاتەرلى ىسىك دەرتىنە شالدىعۋ جانە ودان كوز جۇمۋ دەرەكتەرى ازايعان. ونكولوگيالىق اۋرۋىن اسقىندىرىپ العان ادامدار ءالى دە كوپ. وبلىستا جەدەل جاردەم بريگادالارى جەتىسپەيدى، - دەدى ول.
توقايەۆ بالالاردىڭ تاماقتان جاپپاي ۋلانۋ دەرەكتەرى ازايماي تۇرعانىن العا تارتتى. ونىڭ سوزىنشە، بۇل وقيعالار مەكتەپتەردە ازىق-تۇلىك قاۋىپسىزدىگى ساقتالماي جاتقانىن كورسەتەدى.
-ءبىلىم بەرۋ مەكەمەلەرىندە بولىپ جاتقان كەلەڭسىز وقيعالاردى ايتپاي كەتۋگە بولمايدى. بالالاردىڭ تاماقتان جاپپاي ۋلانۋ دەرەكتەرى ازايماي تۇر. بۇل - ابدەن ۇيات نارسە. بىلتىر 400-دەن استام بالا، بيىل 42 بالا زارداپ شەككەن. بۇل وقيعالار مەكتەپتەردە ازىق- تۇلىك قاۋىپسىزدىگى ساقتالماي جاتقانىن كورسەتەدى. ۇكىمەتكە جاۋاپتى مەملەكەتتىك ورگاندارمەن بىرلەسىپ، وقۋشىلاردىڭ قاۋىپسىزدىگىن قاتاڭ باقىلاۋعا الۋدى تاپسىرامىن. ءبىلىم بەرۋ مەكەمەلەرى قىزمەت كورسەتەتىن ۇيىمدارمەن ساپالى ءارى ناقتى جۇمىس جۇرگىزۋى كەرەك. اكىمدىك وسىنداي ورەسكەل جاعدايلارعا مۇلدە جول بەرمەۋگە ءتيىس. جالپى الەۋمەتتىك سالانىڭ ماڭىزى ايرىقشا. سەبەبى، ءبىز - الەۋمەتتىك ەلمىز، - دەدى مەملەكەت باسشىسى.
پرەزيدەنت قانداي جاعداي بولسا دا، مەملەكەتىمىز ءتيىستى الەۋمەتتىك مىندەتتەمەلەردى ورىندايتىنىن ايتتى. دەگەنمەن الەۋمەتتىك جەڭىلدىكتەر مەن جاردەمگە يە بولۋ ءۇشىن قيتۇرقى ارەكەتتەر جاسايتىن ادامدار از ەمەس.
- مۇقتاج جانداردىڭ بارىنە قاجەتتى كومەك كورسەتىلەدى. الەمدە مۇنداي تاجىريبە سيرەك كەزدەسەدى. ءبىراق ءبىز ءۇشىن بۇل - مىزعىماس ۇستانىم. سونداي-اق ماسەلەنىڭ ەكىنشى جاعى بار. الەۋمەتتىك جەڭىلدىكتەر مەن جاردەمگە يە بولۋ ءۇشىن قيتۇرقى ارەكەتتەر جاسايتىندار از ەمەس. ءتىپتى الەۋمەتتىك الاياقتىق پايدا بولدى دەپ ايتۋعا بولادى. ونداي الاياقتار مەملەكەتكە دە، قوعامعا دا زيانىن تيگىزىپ جاتىر. كومەك شىن مۇقتاج ادامدارعا بەرىلۋگە ءتيىس. سوندىقتان تاعى دا قايتالاپ ايتامىن، الەۋمەتتىك قولداۋ جۇيەسىن مۇقيات زەردەلەۋ كەرەك. وبلىس اكىمى سيرەك كەزدەسەتىن مەتالداردىڭ كوزىن اشۋ ءۇشىن گەولوگيالىق بارلاۋدى بەلسەندى تۇردە جۇرگىزۋ كەرەك دەپ ۇسىنىس ايتتى. قولدايمىن. ۇكىمەت بۇل ماسەلەگە ەرەكشە كوڭىل ءبولۋى قاجەت. وسىمەن كۇن تارتىبىندەگى ماسەلەنىڭ ءبارىن قارادىق. بارلىق تاپسىرمالار ۋاقتىلى ورىندالۋعا ءتيىس. ءار ماسەلە مەنىڭ جەكە باقىلاۋىمدا بولادى. تاعى دا ايتايىن، ەلىمىزدىڭ بولاشاعى تەك ءوزىمىزدىڭ قولىمىزدا. سىرتتان بىرەۋ كەلىپ، بىزگە ءوز جۇمىسىمىزدى ىستەپ بەرمەيدى. بۇل - ماڭعىستاۋ وبلىسىنا تىكەلەي قاتىستى ءسوز، - دەدى توقايەۆ.
ءسوز سوڭىندا پرەزيدەنت قازاقستاندىقتارعا ءۇش تالاپ قوياتىنىن ايتىپ ءوتتى.
- قورىتا ايتقاندا، ءبىرىنشى تالابىم - ءبارىمىز ادال جۇمىس ىستەۋىمىز كەرەك. ەكىنشى تالابىم - ءبارىمىز وزىق ويلى بولۋىمىز قاجەت. ءۇشىنشى تالابىم - جاستارىمىزعا دۇرىس ءبىلىم مەن تاربيە بەرىپ، ولارعا جول اشۋىمىز كەرەك. ال ماڭعىستاۋ وبلىسىنا كەلسەك، ءبىز بۇل ايماقتى جەدەل دامۋدىڭ ۇلگىسى رەتىندە كورسەتۋىمىز كەرەك. وبلىستىڭ الەۋەتى زور. سونى ءتيىمدى پايدالانباساق، بارىمىزگە كەشىرىلمەس كۇنا بولادى. راقمەت، بارشاڭىزعا، - دەپ تۇيىندەدى قاسىم-جومارت توقايەۆ.
جيىندا ماڭعىستاۋ وبلىسىنىڭ اكىمى نۇرداۋلەت قيلىباي، پرەمە-ءمينيستردىڭ ورىنباسارلارى قانات بوزىمبايەۆ پەن ەرمەك كوشەربايەۆ، «قازمۇنايگاز» ۇلتتىق كومپانياسىنىڭ باسقارما ءتوراعاسى اسحات حاسەنوۆ بايانداما جاسادى.
ايتا كەتەيىك، مەملەكەت باسشىسى قاسىم- جومارت توقايەۆتىڭ توراعالىعىمەن ماڭعىستاۋ وبلىسىنىڭ الەۋمەتتىك- ەكونوميكالىق دامۋى جونىندەگى كەڭەس ءوتىپ جاتىر.
