ماڭعىستاۋ وبلىسى: قاراتۇرىن كەن ورنىنداعى ءورت 6 ايدان سوڭ ءسوندىرىلدى
ماڭعىستاۋ وبلىسىنداعى "بوزاشى مۇناي" ج ش س كومپانياسىنىڭ يەلىگىندەگى وڭتۇستىك قاراتۇرىن كەن ورنىنداعى ۇڭعىمادا 6 اي بويى جانعان ءورت ءسوندىرىلدى، دەپ حابارلايدى Kazinform.
وڭتۇستىك قاراتۇرىن كەن ورنىندا وقىستان پايدا بولعان ءورت بيىلعى 9-ماۋسىمنان بەرى اۋىزدىقتالمادى. ءتىلسىز جاۋدىڭ سەبەبى رەتىندە ونەركاسىپتىك قاۋىپسىزدىك كوميتەتى جەر قويناۋىن پايدالانۋشى مەن سەرۆيستىك ۇيىمداردىڭ جىبەرگەن كەمشىلىكتەرىن العا تارتتى. ساراپشىلار اپات ەڭ جوعارعى كۇردەلى دەڭگەيدە ەكەنىن مالىمدەدى.
ءورتتى تۇبەگەيلى جويۋ ءۇشىن سالا ماماندارى اپات بولعان ۇڭعىمانى قوسىمشا بۇرعىلاپ، كەيىن وعان ءورت ءسوندىرۋ ەرىتىندىسىن قۇيدى.
«ەرىتىندىنى قۇيعاننان كەيىن ۇڭعىمانى سەمەنتتەۋ جوسپارلانىپ وتىر. وسىدان كەيىن قالپىنا كەلتىرۋ جۇمىستارى باستالادى. جەر قويناۋىن پايدالانۋشى كاسىپورىن وزىنە قوسىمشا مىندەتتەمەلەر الدى. ماڭعىستاۋ اۋدانى اكىمدىگى مەن مۇناي كومپانياسى اراسىندا ىنتىماقتاستىق تۋرالى كەلىسىم جاسالدى. كەلىسىم اياسىندا ءبىرقاتار ەلدى مەكەندەردەگى الەۋمەتتىك جوبالارعا 50 ميلليون تەڭگە بولىنەدى»،-دەپ جازىلعان كومپانيا تاراتقان اقپاراتتا.
