ماعاۋين شىعارماسىنىڭ جەلىسىمەن تۇسىرىلەتىن فيلمگە سەناري ىرىكتەلىپ جاتىر

استانا. KAZINFORM - بەلگىلى جازۋشى مۇحتار ماعاۋيننىڭ «تازىنىڭ ءولىمى» اتتى اڭگىمەسىنىڭ جەلىسىمەن كوركەم فيلم ءتۇسىرۋ ءۇشىن سەناري ىرىكتەۋ جۇمىستارى ءجۇرىپ جاتىر.

بۇل تۋرالى پرەمەر-مينيستر ولجاس بەكتەنوۆتىڭ سەنات دەپۋتاتىنىڭ ساۋالىنا جولداعان جاۋاپتا ايتىلعان.

- مۇحتار ماعاۋيننىڭ «تازىنىڭ ءولىمى» شىعارماسى نەگىزىندە كوركەم فيلم ءتۇسىرۋ ماسەلەسى بويىنشا قازىرگى ۋاقىتتا قولايلى سەناريلەردى ىرىكتەۋ جۇمىستارى جۇرگىزىلىپ جاتقانىن اتاپ وتەمىز، - دەپ جازىلعان جاۋاپتا.

سونداي-اق جاۋاپتا تازى مەن توبەت كۇنىن بەلگىلەۋ ۇسىنىسى دا كۇن تارتىبىندەگى ماسەلە ەكەنى ايتىلعان.

- بۇل ماسەلە بويىنشا قوعامدىق ۇيىمدار مەن كينولوگتار، تازى مەن توبەت سەلەكسيونەرلەرى 3-قىركۇيەكتى وسىنداي كۇن رەتىندە بەلگىلەۋ مۇمكىندىكتەرىن تالقىلانعانىن حابارلايمىز. بۇل وسى كۇنى قازاقى ءيت تۇقىمىنىڭ حالىقارالىق دەڭگەيدە العاش تىركەلۋىنە، سونداي-اق «قازاق تازىسىنىڭ» الدىن الا رەسمي حالىقارالىق دەڭگەيدە تانىلۋىنا بايلانىستى، - دەپ جازادى ولجاس بەكتەنوۆ.

ەسكە سالساق، بەلگىلى جازۋشى مۇحتار ماعاۋين بيىل قاڭتار ايىندا دۇنيەدەن وزعان ەدى.

اۆتور

ەسىمجان ناقتىباي