ليۆيادا نارازى توپ قالا مەرىنىڭ ءۇيىن ورتەپ جىبەردى

ليۆيانىڭ دەرنا قالاسىندا وتكەن اپتادا بولعان الاپات سۋ تاسقىنىنا بايلانىستى بيلىك تاراپىنان ءتيىستى شارا قابىلدانباعاندىقتان جۇزدەگەن نارازىلىق ءبىلدىرۋشى قالا مەرىنىڭ ءۇيىن ورتەپ جىبەردى، دەپ حابارلايدى قازاقپارات News باسىلىمىنا سىلتەمە جاساپ.

دۇيسەنبى كۇنى كەشكە شەرۋشىلەر قالاداعى ساحابا مەشىتىنىڭ الدىنا جينالىپ، ليۆيا ۇكىمەتىنىڭ جوعارى لاۋازىمدى شەنەۋنىكتەرىن جۇمىستان بوساتۋدى تالاپ ەتكەن. ناتيجەسىندە دەرنا قالالىق كەڭەسى تولىعىمەن تاراتىلدى.

توزىعى جەتكەن ەكى بوگەت قۇلاپ، قالانى سۋ باسىپ، 10 مىڭنان استام ادام رەسمي تۇردە ءىز-ءتۇزسىز جوعالعاندار تىزىمىنە ەنگىزىلدى.

«ب ۇ ۇ- نىڭ ىزدەستىرۋ-قۇتقارۋ توپتارى، جەدەل مەديتسينالىق جاردەم بريگادالارى دەرناداعى قۇتقارۋ جۇمىستارىن ارى قاراي جالعاستىرادى»، - دەدى ۇيىم وكىلى.

نارازىلىق بىلدىرۋشىلەر قالا بيلىگى الدا بولاتىن جاۋىننىڭ كوپ مولشەرى تۋرالى ەسكەرتپەگەنىن ايتادى. ولار ەۆاكۋاتسيالاۋعا بۇيرىق بەرمەي، ۇيدە قالۋعا كەڭەس بەرگەن. ال رەسمي تۇلعالار بۇل اقپاراتتى جوققا شىعارادى.

ۇزاق ۋاقىت كوشباسشى بولعان مۋاممار كاددافي ورنىنان قۇلاعاننان كەيىن بيلىك ءۇشىن كۇرەسكە ۇشىراعان ليۆيادا قازىرگى ۋاقىتتا ەكى ۇكىمەت بار: ءبىرى تريپوليدە جانە ەكىنشىسى ەلدىڭ شىعىسىنداعى اسكەري قولباسشى گەنەرال حاليفا حافتاردىڭ قولداۋىنداعى ۇكىمەت.